Сентябриин 14-дэ Алхана уулын хормойдо аргамжа таталгаар тэмсээн болохонь. Шара набшын халуунай үедэ огторгойдо Риихын одоной мандахада, ямаршье гол мүрэнэй, нуур сөөрэмүүдэй уһан аршаан болодог гэхэ.
Тиигэжэ Алхана уулада аяншалагшадые үлүү олоор татаха, мүн аргамжа таталгые арад зоной дунда дэлгэрүүлхэ зорилготойгоор 2015 онһоо хойшо Үбэр Байгалай хизаарай Агын Буряадай тойрогой Захиргаанай шангуудта хүртэхын түлөө нээмэл тэмсээн үнгэргэгдэдэг болонхой.
Агын Буряадай тойрогой Захиргаанай Физическэ культура болон спорт хүгжөөлгын таһагай дарга Булат Бальжинимаевай мэдээсэһээр, байгша ондо тус тэмсээнэй дүримүүд хубилгагдаа. Тэдэнэйнь ёһоор, 10 хүнһөө (үшөө 4 һэлгэжэ гараха) бүридэһэн команданууд хоёр бүлэг боложо, шадалаа туршалсаха. Нэгэдэхидэнь – аймагуудай болон хотын тойрогуудай, нүгөөдэдэнь – хүдөө һуурингуудай түлөөлэгшэд эрхимээ элирүүлхэ. Тэмсээндэ 18 наһа гүйсэһэн тамиршад хабаадаха аргатай.
- «Алханын Риихэ» жэлһээ жэлдэ олон хабаадагшадые суглуулна. Тамиршадһаа гадна, миин харагшадшье ерэжэ, гоё тэмсээ үзэхын хажуугаар, Алхана ууладаа мүргөөд, аршаанда орожо, бэеэшье элүүржүүлээд бусана ха юм, - гээд, Агын Буряадай тойрогой Захиргаанай Толгойлогшын уялга дүүргэгшэ Билигма Будаева тэмдэглэнэ.
aginskoe.ru сайтһаа