743
Сентябриин 17-һоо 22 болотор Буряадай улас түрын багшанарай колледждо тус эрдэм ухаанай гуламтын байгуулагдаһаар 95 жэлэй ойн баярта зорюулагдан, “Оюутадай шэнэ мэргэжэлтэ болбосоролой ба мэргэжэлэй-хүн талын хүгжэлтын бүрилдэлгэ” гэһэн можонууд хоорондын болбосоролой хуралдаан үнгэргэгдэхэ.
Хэмжээ ябуулгада Казань, Шэтэ, Ярославль, Санкт-Петербург хотонуудһаа, Новосибирскэ можоһоо болон гүрэнэймнай бусад можо хизаарнуудһаа 54 түлөөлэгшэ хабаадаха. Мүн тиихэдэ хүршэ Монголһоо 27 хүн ерэхэ.
- Буряадай багшанарай колледж 2018 оной дүнгүүдээр “Залуу мэргэжэлтэ хүдэлмэрилэгшэд” (WorldSkills Russia) гэһэн хүдэлөөнэй Ородой Холбоото Уласай дунда мэргэжэлэй болбосоролой эрхим 100 эмхи зургаануудай тоодо ороо, - гэжэ Буряадай болбосоролой ба эрдэм ухаанай сайдай орлогшо Галина Фомицкая засагай газарай брифингын үедэ тэмдэглээ.
Хуралдаанай гол сэдэбүүд – уридшалһан мэргэжэлэй хүгжэлтын шэнэ түхэл, болбосоролой шэнэ оршон, мэргэжэлэй болбосоролой шэнэ замууд. Албан хэрэгэй уласхоорондын суглаанууд, үзэсхэлэнгүүд, эрдэм шэнжэлгын ба болбосоролой үйлэ хэрэгүүдэй хэмжээ ябуулганууд, соёлой-болбосоролой нүүдэл суглаанууд гэхэ мэтэ эмхидхэгдэхэ.
Сентябриин 17-до элдэб янзын мэргэжэлнүүдтэ зорюулагдаһан талмайнууд, пленарна зүблөөнүүд, һанамжануудаараа хубаалдаха талмайнууд ба дүхэриг шэрээ үнгэргэгдэхэ. Хуралдаанай хоёрдохи үдэртэ Байгал далай дээрэ “Мэргэжэлэй-хүн шанарай хүгжэлтын тренинг” гэһэн хэмжээ ябуулга болон Буряадай багшанарай колледжын 95 жэлэй ойдо зорюулагдаһан баяр ёһололой суглаан болохо.
Сентябриин 19-дэ 16 сагта колледжын конференц-танхим соо дунда мэргэжэлэй эмхи зургаануудай хүтэлбэрилэгшэдтэ дүн гаргалгын дүхэриг шэрээ эмхидхэгдэхэ. Хүтэлэгшэнь – Болбосорол хүгжөөлгын федеральна дээдэ һургуулиин Мэргэжэлтэ болбосоролой ба мэргэжэл тодорхойлдог байгуулгануудай түбэй захирал Владимир Блинов.
Гадна хэмжээ ябуулгада Ярославлиин багшанарай колледжын захирал, Ородой багшанарай колледжнуудай эблэлэй түрүүлэгшэ Михаил Лавров хабаадаха.
Тус хуралдааниие Буряадай Болбосоролой ба эрдэм ухаанай яаман, Буряадай улас түрын багшанарай колледж эмхидхэнэ.
Буряадай улас түрын багшанарай колледжын сайтһаа гэрэл зураг
