994
Энэ үдэр зал соо нэгэшье сүлөө һуури байбагүй, гадна хүгжэмшэдэй нааданай һүүлээр үшөө удаахан “Браво” хашхараан замхангүй байгаа. Харагшадай нэрьемэ альга ташалган доро Ород гүрэнэй эрхим залуу 100 хүгжэмшэд – Ородой Үндэһэнэй залуушуулай симфониин оркестр – Буряадай филармониин 81-дэхи хаһа нээбэ.
Сентябриин 9-дэ Ородой эгээл залуу симфониин оркестр Улаан-Үдэ хотодо түрүүшынгээ тоглолто табяа. Тоглолтын хүтэлбэри эхинһээ эсэс хүрэтэрөө залуушуулда зорюулагдаһан байгаа, юуб гэхэдэ, тус оркестр залуу зониие классическа хүгжэмдэ дурлуулха зорилготой ха юм. Харин тоглолтодо элдэб наһанай хүнүүд суглараашье һаа, булта ехэ һайшаагаа.
Димитрис Ботинисэй хүтэлбэри доро ажалаа ябуулдаг залуу хүгжэмшэд урдаа олон түсэбүүдые табиһан, тэдэнээ бэелүүлхын тула урагшаа шармайһаар. Классическа хүгжэмэй һонирхолтойшье, дура татамааршье байдагыень залуу оркестр дүүрэн гэршэлээ.
Тоглолтын 1-дэхи таһагта Л.Бетховенэй, И.Брамсын, С.Рахманиновай, Д.Шостаковичой суута бүтээлнүүдһээ хэһэгүүд харагшадай һонорто дурадхагдаа. Харин 2-дохи таһагынь П.Чайковскиин зохёолнуудта бүримүһэн зорюулагдаа. Оркестрэй бүридэлдэ скрипкэ дээрэ Чайковскиин нэрэмжэтэ конкурсын I шангай лауреат Сергей Догадин наадана. Тэрэнэй Улаан-Үдэ ерэһэн ушар хүгжэмдэ дуратайшуулда ёһотой ялас гэмэ үйлэ хэрэг болоо.
Хүгжэм шэнжэлэгшэ, шүүмжэлэгшэ Ярослав Тимофеев тоглолто хүтэлжэ, юрын үгэнүүдээр, шог ёгтойгоор агууехэ композиторнууд тухай хөөрэжэ, классическа хүгжэмэй юртэмсэ руу харагшадые уряалан байгаа.
Тоглолтын эхиндэ Буряадай соёлой сайд Соёлма Дагаева, Буряадай филармониин уран һайханай хүтэлбэрилэгшэ Наталья Уланова гэгшэд харагшадые амаршалаа, айлшадта баяр хүргөө.
Тус тоглолто Ородой Холбоото Уласай Соёлой яаманай дэмжэлгээр үнгэрөө.
Буряад Уласай соёлой яаманай мэдээсэлэй албанай гэрэл зураг
