23 наһатай Эрдэм Доржиев ТНТ теле-субагай эмхидхэдэг «Танцы» гэһэн шоугой 6-дахи хаһада хабаадаха болобо. Сентябриин 7-до ТНТ-гэй агаарай долгиндо гараһан дамжуулга хаража, нютаг хүбүүмнай шэлэн абалгын шата амжалтатай дабаа гэжэ мэдээбди.
Эрдэмэй тайзан дээрэ гарахынь урда шоу хүтэлэгшэ Ляйсан Утяшева юу бэлдээд ерэһэн тухайнь асуухадань: «Элеэ бүргэдэй хатар!» - гэжэ харюусаа. Үнэн дээрээ хальмаг арадай хатар гүйсэдхэхэ гээд, үндэһэн хубсаһыень үмдөөд гараһан Эрдэмые харахадаа, мэдээжэ хореограф Егор Дружинин: «Питерэй юрын лэ ажаһуугша гараба!», - гэжэ шоглон һагад тэмдэглээ. Энээнииень тайлбарилха болоо һаа - тус дамжуулга Санкт- Петербургда болоһон шэлэн абалгада зорюулагдаа бшуу.
Харин Эрдэм Доржиев гүрэнэй хойто ниислэл зөөжэ ошоһоор, оройдоол гурбан һара тухай боложо байна.
- Иимэ «удаан» байжа байгаа хадаа ёһотой петербуржец болоо ха юмши, - гээд, үнөөхи Егор Дружинин хэлэнэйнгээ хурсые дахин- дахин гэршэлээд, бэлдэһэн хатараа харуулхыень уряалаа.
Эрдэм Доржиев аргагүй огсомоор, сортоотойгоор хальмаг хатар гүйсэдхэжэ, харагшадта халуунаар угтуулаа. Зал соо сугларагшад хүл дээрээ бодожо, альгаа ташахадань, үнөөхил Дружинин:
- 100 жэл соо хатаржа мэргэжэһэн хүн гэжэ эли байна. Аргагүй һайнаар хүдэлнэш. Харин мүлижэ-мүлижэ, бэлдэжэ-бэлдэжэ ерээд, гансахан лэ хатараараа бидэниие хужарлуулаад, ямаршье «хэһээлтэ» амсангүй, гаража ябашахаб гэжэ бү һанаарай. Тиимэһээ удаадахи шатада гараһыеш мэдүүлэе. Эгээл тэндэ элеэ бүргэдэйхиһөө ондоо хатар гүйсэдхэхэдэшни, хаража үзэхэбди. «Танцы» шоудо оробош. Баяр хүргэнэб! – гэжэ байгаад енгүүрхээшье һаа, юрэнхыдөө магтаа.
Эрдэм Доржиев тус теле-урилдаанда Буряад орониие түлөөлжэ байһан долоодохи хүн болоно гэжэ тэмдэглэе. Июнь соо Виктория Мункуева шэлэн абалга дабаа һэн. Тэрэ Эрдэмтэй хамта гурбан сая түхэригэй гол шан абахын түлөө тэмсэхэнь гээшэ. Харин тус шоугой урдахи хаһануудта Айжан Степанова, Айхан Шинжин, Милана Хабази, Тимур Базаров, Андрей Балагунов гэгшэд Буряад Улас түлөөлэн хабаадаһан юм.
Евгения Толмачёвагай гэрэл зураг