798
Энэ уулзалгада Улаан-Үдын захиргаанай хүтэлбэрилэгшын уялга дүүргэгшэ Игорь Шутенков, КПСС намһаа һунгалтада хабаадаһан Батодалай Багдаев, «Справедливая Россия» намһаа – Геннадий Бадмаев, «Гражданская платформа» намһаа – Алексей Хандархаев, ЛДПР намһаа Николай Чимитов гэгшэд ерэжэ, һунгалтын дүнгүүд болон һаяын үдэрнүүдтэ Соведүүдэй талмай дээрэ болоһон хүдэлөөн тухай хэлсэһэн байна. КПРФ нам түлөөлһэн Вячеслав Мархаев уулзалгада хабаадахаяа арсаһан байна гээд тэмдэглэлтэй.
Улаан-Үдын засаг даргын һунгалтада хабаадаһан кандидат бүхэн ажаһуугшадай захяа-дурадхалнуудые суглуулһан байна. Сугларагшадай хэлэһэнэй ёһоор, эдэ бүхы хандалгануудтай танилсаха талаар Буряад Уласай Толгойлогшын захиргаан зохихо уулзалга эмхидхээ.
Хэмжээ ябуулгада Батодалай Багдаев Алексей Цыденов болон һунгалтада хабаадаһан хүнүүд хэдэн пункттай эблэрэлгын пактда гараа табижа, ниигэмэй-бодолгын эгээл шухала асуудалнуудаар хамта шиидхэбэри абаха тухай хэлэбэ. Гэхэ зуураа, үнгэрһэн һунгуулиин зүрилдөөтэ асуудалнуудые политическа һалбарида бэшэ, харин хуулиин ёһоор шиидхэхэ тухай Батодалай Багдаев тэмдэглэбэ.
Эдэ ороһон дурадхалнуудые анхаралтайгаар хаража үзэхэ тухайгаа Алексей Цыденов хэлэбэ.
Геннадий Бадмаев Алексей Хандархаев хоёр һунгалта үнгэрөө, хотын мэрээр һунгагдаһан Юрии Шутенков бүхы намуудай түлөөлэгшэдтэй ажал ябуулха бэзэ гэжэ найдалаа мэдүүлээ. Николай Чимитовэй хэлэһээр, ЛДПР намай түлөөлэгшэд хотын зүблэлдэ үнгэрһэн һунгалта үнэн гэжэ тоолоошьегүй һаа, ажаһуугшадтай ажалаа үргэлжэлүүлхэ. Удаань һунгуулиин компаниин үеын эгээл орёо асуудалнуудые тэрэ нэрлэжэ, тэдэниие шиидэлгэдэ туһа хүргыт гэжэ Буряад Уласай Засагай газарта хандаба.
Улаан-Үдэ хотын захиргаанай хүтэлбэрилэгшын уялга дүүргэгшэ Игорь Шутенков һунгуулиин компаниин үедэ ажаһуугшадһаа 1,5 захяа дурадхалнуудые суглуулһан тухайгаа хэлэбэ.
- Ажаһуугшадай дурадхалнуудые тушаалда зууршалагшад хуу суглуулаабди. Тэдэ дурадхалнуудай талаар ажал ябуулагдаха. Тиихэдэ тэдэниие сахим маягаар бүтээжэ, хүнүүд оруулһан дурадхалнууднай бэелүүлэгдэхэ гү, ямар шатада байнаб гэжэ хараха аргатай байха, - гэжэ Игорь Шутенков хэлэбэ.
Анна Огороднигой гэрэл зураг
