920
Анна ОГОРОДНИГОЙ гэрэл зураг
Сентябриин 15-да Улаан-Үдэ хотын Соведүүдэй талмай дээгүүр юнармейцууд болон оюутад Халхын голой байлдаанай Илалтын 80 жэлэй ойдо зорюулагдаһан жагсаалда алхалан гарабад. 1939 оной энэл үдэр Москва хотодо Советскэ Союз, Монгол болон Япон гүрэнүүд Халхын голой шадар байлдаануудые түгэсэхэ тухай хэлсээн баталагдаа һэн.
Анна ОГОРОДНИГОЙ гэрэл зураг
Буряад Уласай Толгойлогшо Алексей Цыденов Илалтын һайндэрөөр амаршалаа.
Анна ОГОРОДНИГОЙ гэрэл зураг
- Хүндэтэ нютагаархид, айлшад, Халхын голой байлдаанай 80 жэлэй ойн баяраар амаршалнаб! Япон булимтарагшад Маньчжури эзэлээд, Халхын голдо байрлажа, саашадаа Монгол, Хитад гүрэнүүдые эзэмдэхэ түсэбтэй байгаа. Энэнь Советскэ Союздашье аймшагтай нүлөөтэй байгаа ааб даа. Халхын голой байлдаанда СССР болон Монгол гүрэнэй туйлаһан Илалтын ашаар 1939-1945 онуудай Эсэгэ ороноо хамгаалгын дайнай үедэ Япон гүрэн Советскэ Союзда добтоолоогүй ушарнуудай нэгэн болоно. Тэрэ үедэ эрхэ сүлөөгөө алдаагүй Монгол гүрэн Эсэгын дайнай үедэ бүхы арга шадалаараа Советскэ Союзда туһа хүргэһэниинь сэгнэшэгүй. Эб нэгэн саашадаа һуухамнай болтогой, - гэжэ уласай хүтэлбэрилэгшэ хэлэһэн байна.
Анна ОГОРОДНИГОЙ гэрэл зураг
Монгол гүрэниие түлөөлжэ, Дорнод аймагай амбан захирагшын орлогшо Ш. Ёл баярай үгэнүүдые хэлээ.
Анна ОГОРОДНИГОЙ гэрэл зураг
- Ород гүрэнэй аха дүүнэр, нүхэд, Халхын голой байлдаанай ветеранууд, тэдэнэй үри хүүгэд, дүтын зон, Монгол гүрэнэй Дорнод аймагай болон өөрынгөө зүгһөө Халхын голой байлдаанай 80 жэлэй ойн баяраар амаршалнаб. Монгол, совет сэрэгшэд ами наһаяа хайрлангүй, манай гүрэнэй ажаһуугшадта эрхэ сүлөө, амгалан тайбан ажабайдал үршөөгөө. Ямаршье сагай тудабал, Илалтын аша габъяа мартагдахагүй. Монгол, совет сэрэгшэдэй баатаршалга тухай һурагшад, залуушуул, олониитыншье мэдэхэ талаар ажал ябуулнабди. Түүхэдэ мартагдаһан үйлэ хэрэгүүдые һэргээхэ талаар горитой ажал хэгдэнэ, - гэжэ Монголой түлөөлэгшэ амаршалба.
Анна ОГОРОДНИГОЙ гэрэл зураг
Монгол гүрэнэй Дорнод аймагай амбан захирагшын орлогшо аймагайнгаа ажаһуугшадай , байлдаанда хабаадагшадай үри һадаһадай зүгһөө Баян Сагаан газарта хүшөө бодхооһонойнь түлөө Буряад Уласай Засагай газарта баяр хүргэбэ.
Анна ОГОРОДНИГОЙ гэрэл зураг
Амаршалгын ёһололой һүүлээр Халхын голой байлдаанда ами наһаяа алдаһан баатар сэрэгшэдэй дурасхаал мүнхэлэн дуугай зогсобод. Удаань Улаан-Үдын болон Буряад уласай Баргажан, Бэшүүр, Зэдэ, Ярууна, Загарай, Захаамин, Ивалга, Кабанск, Хэжэнгэ, Хурамхаан, Хяагта, Мухар-Шэбэр, Байгал шадарай, Сэлэнгэ, Тарбагатай, Түнхэн, Хори аймагуудай кадедүүд болон юнармейцууд жагсаалда гараа. Тэдэнэр 150*8 метр хэмжэүүртэй Георгиевска лентэ намилзуулаа. Удаань нэгэдэхи курсын оюутад жагсаалда гараһан байна.
Анна ОГОРОДНИГОЙ гэрэл зураг
Энэ үдэр полевой кухни, мүнөө үеын буу зэбсэгэй болон уласай бэдэрэлгын «Рысь» бүлгэмэй Халхын гол шадар олоһон археологиин зүйлнүүдэй үзэсхэлэн дэлгэгдээ. Тиихэдэ сэрэгэй-патриотическа сэдэбүүдээр интерактивна талмайнууд хүдэлөө. Энэ үдэр хотын ажаһуугшад болон айлшад түлбэригүйгөөр Буряад Уласай Үндэһэнэй музейдэ орохо аргатай байгаа.
Анна ОГОРОДНИГОЙ гэрэл зураг
Анна ОГОРОДНИГОЙ гэрэл зураг
Анна ОГОРОДНИГОЙ гэрэл зураг
Анна ОГОРОДНИГОЙ гэрэл зураг
Анна ОГОРОДНИГОЙ гэрэл зураг
Анна ОГОРОДНИГОЙ гэрэл зураг
