604
Буряад Уласай эдэй засагай сайдай уялга дүүргэгшэ Елена Тыжинова «Ородой Холбоото Уласай габьяата экономист» гэһэн нэрэ зэргэдэ хүртөө. Түсэблэлгын суглаанда Буряад Уласай Толгойлогшо Алексей Цыденов сайдта хүндэлэлэй тэмдэгыень барюулаа.
- Ородой Холбоото Уласай Юрэнхылэгшэ Владимир Путинай Зарлигаар “Ородой Холбоото Уласай габьяата экономист” гэһэн нэрэ зэргэ Тыжинова Елена Георгиевнада олгогдоо. Энэ ехэ үйлэ хэрэгээр танаа би амаршалнаб! – гэжэ уласай хүтэлбэрилэгшэ хэлээ.
Елена Тыжинова Эрхүү можын Халюута һууринда түрэһэн. “Эдэй засагай кибернетика” гэһэн мэргэжэлээр Новосибирскын гүрэнэй университет дүүргэһэнэй удаа СССР-эй Эрдэмэй академиин Сибириин таһагай Буряадай һалбарида ниигэмэй-эдэй засагай шудалалай таһагта 1985 ондо ажалайнгаа намтар эхилһэн.
1990 ондо “Нютаг можын эдэй засагай хүгжэлтэдэ эрдэм-техникын нүлөөгэй баримтата анализ” гэһэн сэдэбээр кандидадай эрдэмэй диссертаци хамгаалаа.
1992 ондо Буряад Уласай гүрэнэй зөөри захирха талаар гүрэнэй хороондо ажалда ороо. Тэрэнэй сэхэ хабаадалгаар Буряад Уласта гүрэнэй зөөри захирха системэ, гүрэнэй зөөриин сэгнэн тоололго хэгдээ, зөөриин элдэб мэдэлэй предприятинуудай реестр бүридхэгдөө һэн.
2002 онһоо мүнөө болотороо Буряад Уласай Эдэй засагай яаманда эдэй засагай яаманда хүдэлнэ.
2001 ондо Елене Тыжиновада “Буряад Уласай габьяата экономист" гэһэн нэрэ зэргэ олгогдоһон юм.
Буряад Уласай Засагай газарай мэдээсэлэй албанай гэрэл зураг
