Шагай шүүрэлгэ
Буряад Уласта ажаһуудаг арадуудай заншалта наадануудай фестиваль сентябриин 14-дэ үнгэргэгдөө. 16 аймагай 400 гаран хүн эндэ хабаадаа. Эгээл олоор тамиршад һээр шаалганай мүрысөөндэ оролсоо. Энэнь гайхалгүй. Юуб гэхэдэ, түрүү һуури эзэлэгшэ автомобиль шанда хүртэхэ байгаа бшуу. Тиигэжэ Захааминһаа уг гарбалтай Батор Очиров илалта туйлажа, гол шанда хүртэбэ.
Иимэ фестиваль жэл бүри болодоггүйнь харамтай. Тиимэһээ олон хүн зон ерэжэ харана, хабааданашье. Мүнөө жэл спортын хэдэн зүйлөөр тэмсээнүүд болоо. Ородой лапта болон городки, киргизэй морин дээрэ барилдаан, буряад шагай наадан, славян арадуудай гиир шэдэлгэ, һоёд угсаатанай тэбэг болон дэрээр тулалдаан гэхэ мэтэ һонирхолтой нааданууд дурадхагдаа.
Буряад Уласай Толгойлогшо Алексей Цыденов, спортын болон залуушуулай хэрэгүүдэй сайд Вячеслав Дамдинцурунов, соёлой сайд Соёлма Дагаева гэгшэд хабаадагшадые халуунаар амаршалжа, арадуудай наадануудые хүгжөөхэ хэрэгтэй гэжэ тэмдэглээ.
Энэ хэмжээ ябуулга Үбэр Байгалай арадуудай этнографиин музейн талмай дээрэ болоһон байна. Эмхидхэгшэдэй тэмдэглэһээр, арадуудай ёһо заншалда нааданууд гол һуури эзэлнэ ха юм.
- Наадандамнай олоор һургуулиин үхибүүд ерэһэндэнь һайшаалтай. Мүнөө үедэ ганса телефон, компьютер харашаһан хүүгэд газаа гаража, эжы абанарынь, теэбии таабайнуудынь ямар наада наадажа байгааб гэжэ харана. Эдэ бүгэдэ хүн бүхэндэ дүтэ. Спортын талаар бэлэдхэлгүй ямаршье хүн наадаха аргатай гэжэ ойлгоо ёһотой, - гэжэ Буряад Уласай Этноспортын федерациин түрүүлэгшэ Алексей Гыргенов мэдүүлнэ.
Оодарыш - киргиз арадай барилдаан
Тус мүрысөөндэ ганса Буряадай түлөөлэгшэд хабаадаа бэшэ, мүн Үбэр Байгалай хизаарай, Эрхүү можын тамиршад бэеэ туршаа. Монгол орониие Улаан-Үдэдэхи консульствын ажалшад түлөөлөө.
Гиир шэдэлгэдэ ядро түлхилгөөр уласхоорондын классай спортын мастер Григорий Панфилов шалгараа. 32 килограммтай гиир тэрэ 15 метр саана шэдэжэ шадаа.
Бүхы наадануудай дүнгүүдээр Улаан-Үдын тамиршад түрүүлжэ гараа. Байгал шадарай болон Баргажанай аймагуудай команданууд шангай һууринуудые эзэлээ.
Һээр шаалгаар мүрысөөндэ 218 бүхэшүүл хабаадаһан байна. Гадна 10 эхэнэр оролсоо. Захаамин аймагай Баярма Цыденова түрүүлжэ гараа. Эгээл эдир хабаадагша, Захаамин аймагай Дүтэлүүр һууринай 15 наһатай Дарима Будаева шанга тулалдаанда III һуури эзэлээ.
Түрүү һуури эзэлхын түлөө Аха аймагай Баясхалан Габанов болон Захаамин аймагай Батор Очиров хоёр тулалдаа. Энэ шата хүрэтэр эдэ хоёрнай тус тустаа 13 һээр хухалһан байна. Үшөө хоёр һээр хухалжа, Батор Очиров чемпион болоо. Батор хадаа 2017 ондо уласай “Наадан-Сурхарбаанда” абсолютна чемпион болоо һэн. Урда жэлнүүдтэ Захааминай баатар волейбол наадагша бэлэй.
Эмхидхэгшэдэй хэлэһээр, тус хэмжээ ябуулга жэл бүри болохоор хараалагдана.
Борис Балдановай гэрэл зурагууд