«Соёл» гэһэн үндэһэн түсэлэй хэмжээндэ Киногой жаса хүдөө нютагуудай клубуудые кинозал болгон тоногжуулха талаар мүрысөө эмхидхэжэ, илагшадтань мүнгэ һомолно.
- Энэ программада хабаадажа, мүнгэндэ хүртэхэ талаар аймагай захиргаан ехэ ажал хээ. Нэн түрүүн аймагай соёлой байшанай нормативна-техническэ дансануудай талаар асуудал шиидхэгдээ. Юундэб гэхэдэ, мүнгэн байшанай эзэнэй бюджетнэ бэшэ жасада һомологдоно – энэ хадаа мүрысөөнэй гол эрилтэ болоно. Буряад Уласай оруулһан 13 мэдүүлгэнүүдһээ 7-иинь амжалта туйлаа, тэрэ тоодо Бэшүүр аймагай соёлой байшан, - гэжэ Бэшүүр аймагай соёлой таһагай дарга Лариса Валентиновна Захарова хэлэбэ.
Аймагай соёлой байшанда тусхай экран болон кинопроектор табигдажа, ажаһуугшад юрын болон 3D форматда фильмүүдые хараха аргатай болохо.
- Августын 30-да хэлсээ батаалабди. 60 үдэрэй туршада 5 сая түхэригэй тоног түхеэрэмжэ асарагдажа, ноябрь һарада тодхогдохо. Декабриин һүүл багта кино харуулагдажа эхилхэ, тиихэдэ хүүгэдэй биледэй сэн 100 түхэриг, томошуулай - 200 түхэриг гэжэ багсаамжалагдана, - гэжэ соёлой байшанай захирал Полина Меркурьевна Крюкова тэмдэглэбэ.
Эндэ ород болон хари гүрэнүүдэй кинофильмүүд харуулагдаха, тиихэдэ 50% -нь ород кино байха ёһотой. Иимэ эрилтэ киногой жаса табина гээд тэмдэглэлтэй. Шэнэ жэлэй урматай бэлэгтэ Бэшүүр аймагай ажаһуугшад хүртэхэнь.
Буряад Уласай Бэшүүр аймагай сайтһаа гэрэл зураг абтаба