854
Хэжэнгэ аймагта буддын шажанай эгээл томо Джарун Хашорой субарга һэльбэн шэнэлэгдээ. Зуун жэлэй ойгоорнь Буряад Уласай Толгойлогшо Алексей Цыденов уласай ажаһуугшадые амаршалаа.
Джарун Хашорой агуу субаргын барилга Хэжэнгын дасанай дэргэдэ арад зоной оролдолгоор 1915 ондо эхилээ һэн. Тэрэ барилга 4 жэлэй туршада үргэлжэлжэ, 1919 ондо дүүрэһэн юм. Энэ нангин шүтөөнэй субарга Непалай ниислэл Катманду ходо шадар байдаг “Бодхнатх” гэжэ агууехэ субаргадал адли юм. Домогой түүхээр тэрэ субарга манай эрын III дугаар зуун жэлдэ Будда Кашьяпын үедэ бодхоогдоһон байгаа.
1937 ондо Агууехэ субарга Хэжэнгын дасандал адли тэһэлэгдэжэ, үгы хэгдээ һэн. Буддын шажантанай ба ниитэ зоной хүсөөр, Буряад Уласай Заагай газарай мүнгэн дэмжэлгээр 2001 ондо октябрь соо субарга шэнээр бодхоогдожо арамнайлагдаа һэн. 100 жэлэй ойн баярта энэ субарга һэльбэн шэнэлэгдээ.
- Хүндэтэ нютагаархид! Джарун Хашорой агуу субаргын зуун жэлэй ойгоор амаршалнаб! Энэ субарга болбол ганса Хэжэнгэ аймагта бэшэ, харин Буряад орондо, ба бүхы гүрэнэй буддын шажанай һүлдэ болоно. Энэ буряад арадай үргэл мүргэлэй газар, - гэжэ Буряад Уласай Толгойлогшо Алексей Цыденов амаршалаа.
Уласай хүтэлбэрилэгшын хэлэһээр, энэ субарга арад түмэнэй хүртээл болоно.
- Засагай газар һэльбэн шэнэлхэдэ туһалаа, харин субаргада гэжэ мүнгэ суглуулжа, марафон үнгэргэһэн, һэльбэн шэнэлһэн хүнүүдэй габьяа сэгнэшэгүй. Энэ баяр манай гэр бүлэнүүдтэ амглалан байдал, ута наһа ба жаргал асараг гэжэ үреэхэ байнаб, - гэжэ Толгойлогшо тэмдэглээ.
Буряад Уласай Засагай газарай мэдээсэлэй албанай гэрэл зураг
