Каменск тосхоной «Молодежный» микрорайондо хүүгэдэй наадаха талмайн нээлгын баяр ёһолол үнгэргэгдөө. Хүүгэдэйшье, томошуулайшье бэе һорихо нааданай тамирай талмай ажаһуугшадай хандалгаар баригдаа.
Буряад Уласта 2019 ондо «Гэр байра болон хотын оршон» гэһэн үндэһэн түсэлөөр парк, сэсэрлиг, сквер, гэр шадархи талмайнуудые болбосон түхэлтэй болгохо талаар 306 сая түхэриг шэглүүлэгдээ. Жэлэй дүүрэтэр улас дотор олониитын 120 газар болон олон байратай гэрнүүд шадархи 114 талмай шэнэлэгдэхэ.
Федеральна түсэлэй хэмжээндэ Кабанск аймагай Сэлэнгэ һууринай түрэһэн үдэртэ дашарамдуулан, велопарк нээгдэһэн байна. Велосипедээр ябаха дуратайшуулда 3 метр үргэнтэй 1 модон утатай асфальтаар хушагдаһан харгы баригдаа. Харгын гэрэлтүүлгэшье хэгдэнхэй.Баскетбол наадаха талмай паркда шэнэлэгдээ.
Аймагай түб һуурин Кабанскда Эсэгэ ороноо хамгаалгын Агууехэ дайнай ветерануудта зорюулһан хүшөө шэнэлэгдэнэ.
- «Гэр байра болон хотын оршон» гэһэн түсэл 2024 он болотор бэелүүлэгдэхэ. Эгээл шухалань гэхэдэ, ажаһуугшад хаана, заһабарилгын ямар ажал хэгдэхэб гэжэ шиидхэнэ. Эдэбхитэйгээр дурадхалнуудаа оруулхыетнай уряалнаб, - гэжэ Кабанск аймагай хото барилгын, зөөриин болон газарай харилсаануудай талаар хүтэлбэриин дарга Дмитрий Гурулев хэлэбэ.
Жэлэй дүүрэтэр энэ түсэлөөр Кабанск аймагта 25,8 сая түхэриг шэглүүлэгдэхэ. Энэ мүнгөөр аймагай 10 нютагта олониитын 11 газар болон гэр шадархи 34 талмай заһабарилагдаха юм.
«Болбосон түхэлтэй хотын оршон байгуулга» гэһэн түсэл «Гэр байра болон хотын оршон» гэһэн үндэһэн түсэлэй хэмжээндэ 2024 он болотор бэелүүлэгдэхэ. Федеральна түсэлдэ Буряад уласай 104 хүдөө нютаг болон ниислэл – Улаан-Үдэ хото хабаадана.
Анна Огороднигой гэрэл зураг