Сентябриин 20-до Агын Буряадай тойрогой түбтэ Буряад хэлэнэй үдэр нээгдээ. Хэмжээ ябуулгануудай, урилдаа мүрысөөнүүдэй үнгэргэгдэхэ хэдэн талмайнуудта адуунай, хониной нооһоор хэгдэһэн бүтээлнүүд, эмтэй, домтой ургамалнууд болон бусад элдэб зүйлнүүд нюдэ хужарлуулан табигдаа. Энэ һайндэрые Агын Буряадай тойрогой Захиргаан, Агын ниигэмэй ажалшадай эрдэм мэдэсые дээшэлүүлхэ дээдэ һургуули, Үбэр Байгалай хизаарай Буряад соёл хүгжөөлгын түб эмхидхэнэ.
Балшар хүүгэд “Барбаадай” урилдаанда шүлэгүүдые уранаар уншаха юм. Эдиршүүл, залуушуул болон наһатайшуулшье “Эрхим диктант” бэшэжэ, бэеэ туршаха, буряад арадай дуунуудые “Талын аялганууд” урилдаанда гүйсэдхэхэ, “Шагай наадаар” мүрысэхэ.
Хүүгэдэй сэсэрлигүүдтэ зурамал кинонууд харуулагдаха, хүүгэдэй ёохор түрүүшынхиеэ үнгэргэгдэхэ. “Ага-интеллект” нааданда сэсэ буляалдаан болохо. Музейнүүд болон номой сангуудта уран зохёолшодтой, ирагуу найрагшадтай уулзалганууд, хэшээлнүүд үнгэргэгдэхэ. Буряад хэлэнэй үдэр суута эрдэмтэн Гомбожаб Цыбиковэй Баруун Жуу хүрэ- һөөр 120 жэлэй ойдо зорюулагдаһан эрдэмэй хуралдаагаар түгэсэхэ.
Агын аглаг талада буряад арадай жэнхэни ажабайдал, үндэһэн хэлэн, соёл, уран зохёол, урлал нангинаар сахигдана.
Анна Огороднигой гэрэл зураг