1050
Француз Уласай суута Юрэнхылэгшэ байһан үндэр наһатан, манай гүрэндэ, соёл, хэлэндэмнай эльгэ нимгэтэй Жак Ширак үнгэрһэн долоондо алтан дэлхэйһээ халин ошоо. Энээн тухай уйдхар гашуудалта һураг олондо мэдээсэл тараадаг дэлхэйн бүхы хэрэгсэлнүүд тунхаглаа.
Юрын бэшэ юрэнхылэгшэ
87 наһанайнгаа үльмы гэшхэһэн үбгэн юрэнхылэгшэ Париж хотодо, гэр бүлөөрөө ажаһуудаг гэртээ, дүтынгөө хүнүүдэй дүхэриг соо аалиханаар аялаа гээд дуулгагдана. Хүндэтэ ахатамнай бурхандаа хариба гэжэ дуулахадаа, харанхы һүниһөө абан, хотын түб руу яаража, гүрэнэй ехэ даргын байрладаг Елисейн ордон соо дэлгээгдэһэн дурасхаалай дэбтэртэ гашуудалай үгэнүүдые бэшэхэеэ албатан арадынь олоороо ошоо.
“Табадахи Улас” гээд алдаршаһан шэнэ үеын француз гүрэнэй ниислэл хотын мэрэй тушаалда гурба дахин һунгагдаад, 18 жэлэй туршада амжалта ехэтэйгээр ажаллаха үедөө, хажуудаа харуул табяагүй, албанай машинаар харгы замуудые хаалгангүй, хотынгоо ажаһуугшадтай хамта ябадаг байһан.
Долоон жэлэй болзороор юрэнхылэгшын тушаал түрүүшынхиеэ эзэлээд, гүрэнэй хуули һэлгүүлжэ, табан жэлэй хизаарлал тогтооһон алдартай. Тэрэнээ баримталан, удаадахи болзортоо һунгагдажа, тоотой табан жэлэйнгээ үнгэрхэдэ, хуулиин эрилтэ жэншэдгүйгөөр дүүргэжэ, Елисейн ордонһоо зөөжэ гараһан Жак Ширагые француз арад аргагүй ехээр хүндэлдэг.
Дуутай, суутай эхэ оронойнгоо дээдын тушаал 12 жэлэй туршада, 1995 онһоо 2007 он болотор эзэлжэ байха үедөө гүрэн түрэ дотороо арадай байдал һайжаруулһан, эдэй засаг хүгжөөһэн юм. Уласхоорондын хэрэгүүдтэ эдэбхи ехэтэйгээр оролсоходоо, ехэрхүү зан гаргажа замбуурангүй, бусад оронуудай ударидагшадтай удха ехэтэй хөөрэлдөөнүүдые ухаатайгаар хэдэг байһан туладань, “Табадахи Уласые” дэлхэйн гүрэнүүд үлүү ехээр хүндэлдэг байһан гээд мэдээжэ.
Онегиниие оршуулһан намтартай
Ород хэлэндэ дуратай Жак Ширак манай гүрэнтэй сэдьхэлэй һонин холбоотой байһан юм. Дулаахан энэ мэдэрэлээ ахатан бүхы наһан соогоо хадагалжа ябаһан. Арбан юһэтэй гүлмэр залуу хүбүүхэн Александр Пушкинай суута “Евгений Онегин” поэмэ ородһоо француз хэлэндэ оршуулһан байгаа. Ехэ һургуулиин багшанарынь тэрэ оршуулгыень һайшааһаншье гэлсэдэг. Гэбэшье, тэрэ үеын хэблэлнүүд залуу хүбүүнэй тэрэ ажал хэблэхэеэ арсаһан гэхэ. Хожомынь засагай газар толгойлжо, гүрэн түрынгөө юрэнхы сайд болоһон хойнонь гүйлдэжэ ерээд, тэрэ оршуулгыетнай хэблэе гэжэ дурадхаа юм ха. Тиихэдэнь Ширак арсаа. Хожомдожо хэгдэһэн дурадхал тэрэ сагтань таарамжагүй байгаа алтай.
Француз Уласай юрэнхы сайдаар, удаань юрэнхылэгшөөр ажаллажа байхадаа, Жак Ширак манай гүрэнтэй нягта харилсаа холбоо тогтоогоод, Борис Ельцинтэй, удаань Владимир Путин юрэнхылэгшэнэртэймнай ехэ зохидоор хөөрэлдэдэг, нүхэсэдэг бэлэй. Путинтай “ши” гэлсэдэг байһан. Уласхоорондын элдэб орёо асуудалнуудаар һаналаа нэгэдэдэг, бэе бэеэ дэмжэдэг, дэлхэй дээрэ дайн дажарай болохогүйн түлөө оролдодог байгаа бшуу. Америкын Холбоото Штадуудай ээлжээтэ аашаяа харуулжа, Ирагта дай үүсхэхэдэ, манай гүрэнэй толгойлогшо Владимир Путин, Германай Холбоото Уласай федеральна канцлер байһан Герхард Шрёдер, Француз Уласай юрэнхылэгшэ Жак Ширак гурбан зүбшэн хэлсээд, Европын энэл гурбан гүрэн США-гай тэрэ ябадал эрид буруушааһан байха юм. НАТО бүлгэмэй зүүн тээшээ хилэеэ үргэдхэхэ хэрэгые Жак Ширак балай дэмжэдэггүй, Зүүн Европын зарим гүрэнүүдэй Ородой Холбоото Уласые худал хуурмагаар зэмэлхые ехэ буруушаадаг байгаа. Гэбэшье, Америкэтэй эбээ таһалаагүй. Эдэ бүгэдые бүримүһэн шэнжэлхэдэ, нүгшэһэн ахатан үнэхөөрөөшье Франциин эрхим юрэнхылэгшэ, XX зуун жэлэй гүрэн түрын агууехэ ажаябуулагша байгаа гэжэ ойлгохоор.
Өөрөө яһала баян хүн байһан хадаа, музей, театрнуудта, соёлой бусад эмхинүүдтэ эдэбхи ехэтэйгээр туһалдаг байһан. Гансашье өөрынгөө гүрэндэ бэшэ, мүн ондоошье оронуудта иимэ ажал ябуулдаг һэн. Жак Ширагай энэ ажаябуулгань манайшье эндэ сэгнэгдэжэ, 2008 ондо Россиин гүрэнэй шанда тэрэ хүртэһэн юм.
Фото: uk.makemefeed.com
Автор: Василий ЦЫБИКОВ
