1083
Октябриин 1-дэ Эрхүү можын амбан захирагша Сергей Левченко Эхирэд-Булагад аймагай шэнэ мэр Геннадий Осодоевтой уулзаа.
Энэ уулзалгада аймагай түлөөлгын эмхиие толгойлогшо Игорь Усов, Усть-Ордын Буряадай тойрогой Захиргааниие ударидагша Анатолий Прокопьев гэгшэд хабаадаа.
Һунгалтада оролсожо, олоной дэмжэлтэдэ хүртэһэн Геннадий Осодоев Игорь Усов хорёые Сергей Левченко энэ уулзалгын эхиндэ амаршалһан байна. Тэрэшэлэн нютагай ажаһуугшадай байдал һайжаруулха талаар ямар хэмжээнүүд абтанаб гэжэ хөөрөө. Тиихэдээ 60 үхибүү багтаахаар Тугутуй һууринда сэсэрлиг, Алужино һууринда һургуули бодхоогдохонь гээд мэдээсээ. Гадна Усть-Орда тосхондо тамирай томо танхим 2002 ондо баригдажа эхилһэн аад, мүнгэнэй дуталдалһаа боложо, ашаглалда тушаагдангүй үлэшэһэн тухайнь дуулгаба. Тиигэжэ энэ барилга үргэлжэлүүлхын тулада арга боломжо яагаад бэдэрхэ тухай зүбшэбэ.
Гадна Усть-Орда тосхоной ажаһуугшадай олон болоһон ушарһаа тэндэ һургуулиин шэнэ байшан бариха талаар хэмжээнүүдые абалгада туһаламжа үзүүлхыень Геннадий Осодоев уряалба. Сергей Левченко заатагүй дэмжэхэб гэжэ үгэ үгэбэ.
Гэрэл зураг: Усть-Ордын Буряадай тойрогой Захиргаанай сайтһаа
Автор: Сарюуна Эрдынеева бэлдэбэ
