884
Буряадай ниислэл хотодо октябриин 19-дэ үүлтэртэ малай можонууд хоорондын үзэсхэлэн эмхидхэгдэхэ. Тус хэмжээ ябуулга Буряад Уласай хүдөө ажахын болон эдеэ хоолой яаман, «Буряад Уласай мэдээсэлэй-методологическо түб» болон Буряад Уласай үүлтэрэй гүрэнэй албан эмхидхэнэ.
«Baikal Agro Farm» үзэсхэлэндэ хальмаг, сагаан толгойто казах, симментал, хара эреэн үүлтэрэй мал, Үбэр Байгалай нарин нооһото, буряад шэрүүн нооһото, «Бүүбэй» үүлтэрэй хонид, буряад морид, ашаа шэрэхэ ород агта хүлэг үзэсхэлэндэ табигдаха. Эрхим үүлтэрэй мал мэргэжэлтэ шүүбэришэдэй комисси элирүүлхэ юм. Комиссиин бүридэлдэ Буряад Уласай хүдөө ажахын болон эдеэ хоолой яаманай түлөөлэгшэд болон эрдэмтэд орохо.
Хэмжээ ябуулгын үедэ Буряадай зохёохы бүлэгүүд тоглолтонуудые харуулха. Арһаар үйлэдбэрилгээр, тиихэдэ түмэршэ дарханай мастер-классууд эмхидхэгдэхэ, гэрэл зурагуудые буулгаха газар, халуун хоол бариха газар хүдэлхэ юм.
«Baikal Agro Farm» үзэсхэлэнэй хэмжээндэ мал үсхэбэрилгын тоног хэрэгсэлнүүдэй үзэсхэлэн, агрофестиваль үнгэргэгдэхэ. Тэрэшэлэн арһан, нооһон, адуунай хилгааһан, шаажан, модон гэхэ мэтэһээ бүтээгдэһэн зүйлнүүд, дурасхаалай бэлэгүүд олоной һонорто дурадхагдаха. Тиихэдэ хүдөө ажахынуудай үйлэдбэрилһэн эдеэ хоолшье наймаанда дэлгэгдэхэ юм.
Хэмжээ ябуулгын үедэ үүлтэртэ мал худалдан абаха аукционууд эмхидхэгдэхэ. Фермернүүд болон хүдөө ажахынууд үзэсхэлэнэй үедэ мал, техникэ, хэрэгсэлнүүдые худалдан абаха аргатай байха.
«Россельхозбанк», «Биотехнологии» бүлгэмүүд, олзын хэрэг эрхилэгшэ Башкуев Степан Филиппович болон бусад - хүдөө ажахын үзэсхэлэнэй эбээн тэдхэгшэд. Улаан-Үдэ хотын Покровская, 33а/1 хаягаар үзэсхэлэн дэлгэгдэхэ. Үзэсхэлэн хараха дуратайшууд түлбэригүйгөөр орохо аргатай.
Анна Огороднигой гэрэл зураг
