“Номой дугылан-2019” һайндэрэй дүнгөөр “Эрхим ном” гэһэн урилдаанда “Хүүгэдэй болон эдиршүүлэй эрхим ном” хэһэгтэ “Алтан хайша. Золотые ножницы» гэһэн Ирина, Ольга Ертахаевануудай, “Буряад хэлэн дээрэ жэлэй эрхим ном” хэһэгтэ Галина Базаржаповагай “Буусын һургаал”, “Жэлэй эрхим ном” хэһэгтэ “Экос” Хэблэлэй байшангай “Баргузинские промысловики” номууд илажа гараа. Энэ ушартай дашарамдуулан, Галина Базаржаповагай ажал ябуулга тухай һанамжа толилхомнай.
Бэлигтэй уран зохёолшо Галина Хандуевна Базаржаповатай дүтэ танил бэшэшье һаа, олон тоото зохёолнуудыень: замай тэмдэглэлнүүд, оршуулганууд болон юрэнхы ажаглалтануудыень, уран хурса шүлэгүүдыень, уянгата зураглалнуудыень ехэтэ һонирхон уншадагби.
Уласайнгаа ори ганса “Байгал” сэтгүүлэй эрхилэгшэ боложо, хэжэ байһан эсэшэ сусашагүй хүдэлмэрииень сэгнэдэгби. Һүүлэй үедэ энэ сэтгүүлнай гүнзэгы удхатай, гоё һайханаар шэмэглэгдэнхэй, уран зохёолой дээжые удхан хэблэжэ гаргана.
Дугаар бүхэниие хүсээжэ, тааруулжа, элдэб зүйлнүүдые суглуулжа, уншагшадай анхаралда табиха гээшэ хүндэхэн гэжэ һананаб. “Байгалнай” ондоошье гүрэнэй, жэшээлхэдэ, Монголой, Яхадай уран зохёолшодой бүтээлнүүдые мандаа дурадхана.
Үни хада уншаһан Чадраабалын Лодойдамбын “Тунгалаг Тамир” гэһэн романиие дахинаа уншаха хүсэлтэй һэм. Одоол минии һанаашаар, сэтгүүлнай энэ зохёол хэблэжэ захалба.
Бэлигтэй яхад уран зохёолшо Евдокия Иринцеева – Огдогой «Дуратай юм һаа, дуранһаан бү арса” гэһэн сэдьхэл зүрхэ хүдэлгэмэ зохёолые уяран байжа уншааб. Манай нютагай басаган, бэлигтэй уран зохёолшо Надежда Гармаевагай ялас гэмэ оршуулгатай, хүнэй үнэн зүрхэнһөөн уярма зохёолтой танилсаха арга боломжо олгоһондонь баяртайб.
Гэхэтэй хамта, энэ сэтгүүлые хүтэлжэ, олон жэл соо бүхы арга шадалаа зорюулжа ябаһан Галина Хандуевнагай өөрынь зохёолнуудые ехэтэ һонирхон уншадагби. “Эльгэлэн энхэрһэн төөбиимни” гэһэн үгүүлэл соогоо ёһотойл гүнзэгы ухаатай, тэсэбэри ехэтэй хүгшэнэй дүрэ ямар бэрхээр харуулаа гээшэб.
Газар дээрэхи ганса хүбүүгээ дайнда алдаад, урин номгон бэритэеэ, ганса монсогор аша басагатаяа үлэһэн хүгшэндэ ямар ехэ жаргал тудаба гээшэб. Бэринь һанаашаарнь үшөө басагатай болобо ха юм. Ажабайгаа алтан аша басагамни гансаарханаа үндыхэнь, нүхэрөө дайнһаа хүлеэһэн зандаа байһан бэридээ халдажа, үшөө үхибүүтэй болыш гэжэ хэлэжэ шадахагүй байгаа.
Хүгшэнэй һанаашаар аша басагандань бурхан эжэл үгэбэ. Хүгшэн баярлажа, газарташье хүргэнгүй, гар дээрээ үргэнэ. Угайдхадаа, Баяр абгаяа нюдэндөө хаража байһан мэтэ зугаалхадань, бүришье уярна, сэдьхэлынь ханана.
Төөбиитэеэ хоюулан бухалшалжа ябаһанаа ямар һонирхолтойгоор бэшэнэ гээшэб. Бишыхан хүүхэнэйнгээ үдэрэйнгөө хүнэһэ – эдеэтэй хүрэнгэеэ адхажархихадань, нэгэшье зэмэлэнгүй, хангай дайдынгаа эзэдые хүндэлбэш гэжэ һанааень заһана. Баарһан хоёрой арай гэжэ орбойлгоһон бухалнуудынь булимтаран тээжэ абаһан колхозой даргын аашые харанабди. Өөрөө хэршье досоогоо муудаа һаа, “хожом гэжэ байха даа, ходо иигэжэ ябахагүйбди” гэжэ хүүгэнэйнгээ сэдьхэлые тэгшэлнэ.
Тиимэрхүү барга бүдүүн аашатай ноёд нютаг бүхэндэ байгаал бэлэй. Манай эбиидэ, дүрбэн үхибүүтэй ганса эхэнэртэ, усадьбада гэжэ, сула бута, улаан жэбэтэй намаг газар үгэгшэ бэлэй. Эбиимнай һаалишан, ажалай хоорондуур үбһөө абаха гэжэ зунаа дүүрэн ябагша һэн. Эгэшэмни багашаг, эбиигээ дахаха. Үлэн хооһон бинь нялха нарай дүү хүбүүгээ һахихаб. Үдэрөө дүүрэн уһан сооһоо ногоо шэрэжэ гаргажа, хатаажа абагша һэм гэжэ эжынгээ хөөрэһыень һанахадаа, эльгэ зүрхэмни үбдэдэг. Һайн гутал байха бэшэ, улаан хүлөөрөө намаг ойможо, эды тэды бухал абажа, ганса үнеэнэйнгээ үбһэ нөөсэлдэг байгаа.
Манай буряад эжынэр тэсэбэритэй, хатуу шэрүүниие үзэһэн, даб гэһэн юумэндэ хүдэлхэгүй, номгон байгаал даа.
“Минии үзөөгүй эрдэмдэ һуража, минии ябаагүй газар үзэжэ ябаарай, хүүхэмни”, - гэжэ дээдэ һургуулида аша басагаяа хүгшэн эльгээнэ. Энэ һайхан үреэлынь шэдитэ дали болон, Галина Хандуевнагай хуби заяанда нүлөөлөө һэн.
Захаамин аймагай Дархинта нютагай үндэр наһатай бэлигтэн Доржо Дымпилович Гармаевай зураг
Хүгшэнэй ганса хүбүүн дайнда мордоходоо, һүүлшынгээ харгыда инаг нүхэрөө тэргэдээ һуулгаад, алтан үриеэ зүрхэндөө няагаад, аяар жараад модон соо харгыда алхалжа ябахадаа, юу бодооб даа, досоогоо? Түрэһэн дайдаяа, түрэл гаралаа, эгээл үнэтэй сэнтэй уладаа хэтын хэтэдэ орхин ошохом гэжэ тухайлжа ябаа гү, магад? Хэды мянган эрэшүүл иигэжэ мордооб... Хаагуур, аюулта тэмсэл дундуур манай хүбүүд унаал. Хүгшэн эхэнүүдынь, инаг ханинарынь, багахан хүүгэдынь яатараа хүлеэгээ һэм...
Манай Далахайһаа ерэ гаран эрэшүүл мордоһон, шүүд лэ дүшөөд хүн эрьежэ ерэһэн, олон хүн һураггүйгөөр үгы болоһон, эдэ улад хаана унаһан байгааб, хэншье мэдэнэгүй.
Галина Базаржаповагай үшөө нэгэ “Одбол Сэсэг” рассказ соо манай буряад зоной эгээл һайн нигүүлэсхы сэдьхэл тодо харуулагдана. Ажабайдалай сохилтодо орожо, ухаагаа һамарһан Жигмид тухай сэдьхэлээ хүдэлгэн уншабаб. Ямар ухаантай бэрхэ айл үхибүүень үри хэжэ абажа, ямар бэрхэ хүн болгожо табяа гээшэб.
Манайшье нютагай нэгэ хүгшэн анхандаа яһала бэрхэ, алтанай магазинда наймаашан байтараа муудашаһан, баһал айл айлаар, нютаг нютагаар ябажа байдаг һэн. Тэрэниие үлүү үзэхэ хүн үгы, һайн һанахадаа оробо гэлдэн, хүндэтэй ямбатай хооллуулаад гаргадаг бэлэй.
Баһал Жигмидтэй адли олон хүүгэдые түрөөд, үхибүүдынь олон айл үргэжэ, тэдэнь яһала бэрхэ хүнүүд боложо, хүл дээрээ гараад ябадаг. Одбол Сэсэг шэнги сэбэр һайхан басагадшье тэдээн соонь бии һэн.
“Нэрэтэ бэлэг” гэһэн рассказ соогоо Галина Хандуевна бэлэг заатагүй гараараа барима, нюдөөрөө обёормо юумэ байхагүй, бүхы саашанхи ажаябадалда зорюулһан үреэл байжа магад гэжэ ойлгуулна. “Бурханай айладхал гээшэ эгээл сэнтэй” гэһэн бодол энэ рассказ сооһоо тодорон гарана. Тиимэл даа, хүгшэдэй үнэн зүрхэнһөө хэлэһэн үреэл бүхы наһан соо һанагдажа, сэдьхэл зүрхыем жэгнэжэ байдаг. Үндэр наһатанай үреэл дуулаха гээшэ ехэ зол лэ даа.
“Тарби эмгэйн бэлэг” гэһэн рассказ соо Галина Базаржапова ямар гоёор бидэндээ, уншагшадтаа, бэлэг барина гээшэб. “Би мүнөө Тарби эмгэйн бариһан сэнхир хүхэ огторгойн мандалдал үнгэтэй торго дурасхаал болгон та бүгэдэндөө баринаб. Хадагалжа ябаарайт: ханамжатай мэдэрэл досоотнай түрэхэ. Нарилжа ябаарайт: наартай зохидоор аза хэшэг дуудан хурылха”.
Энэ бэлэгынь хүндэтэй дээрэ хүлеэн абажа, үнэн зүрхэнһөөн баяр хүргэжэ байхадам, Исай Калашниковай нэрэмжэтэ уран зохёолой шанда, уданшьегүй Номой дугыланай болоходо, «Буряад хэлэн дээрэ жэлэй эрхим ном» гэһэн шанда Галина Базаржаповагай “Буусын һургаал” ном хүртөө гэжэ дуулабаб.
Үнэтэ шангуудаар дабхар баяраа мэдүүлжэ, һайн һайханиие хүсэнэб, нютагайнгаа басаганда.
Екатерина РИНЧИНОВА, ажалай ветеран, хүдөө бэшэгшэ.
Захаамин аймагай Далахай нютаг