Хэжэнгэ аймаг дотор Загаhата нютаг хүн зонойнгоо тоогоор эгээл томо нютагуудай нэгэниинь байhан, байнашье.
1960-аад онуудай эсэcһээ эхилээд, 1980-яад онуудай тэн хүрэтэр манай Чисаанын дунда hургуулида 600 hайса гаран hурагшад эрдэм ном шудалдаг hэн. Эгээл энэ үеэр үнэр баян юhэн үри хүүгэдтэй айл болохо Николай Хуриганович, Намжилма Жамсарановна Бархалеевтэнэй бүлэдэ дүрбэдэхи үринь боложо Бадма хүбүүн, мүн тиихэдэ Гашаринчинов Батодоржо Рабжуевич Дашама Гармаевна Дамбаева хоёрой гэр бүлэдэ ууган басаган Эржена мүндэлөө hэн.
Угаа уһанда хаяагүй
Эжы баабайн эрхэхэн энэ хүбүүн басаган хоёр нютагайнгаа эрдэмэй гуламтын богоhо үдэр бүри алхажа ябахадаа, ерээдүйнгөө харгы замые нэгэн болохо, шэмхэхэhээ нэгэ мяхатай, шэбэнэхэhээ нэгэ үгэтэй, ажабайдалайнгаа замаар нэгэн доро хамта алхалхабди гэжэ хаанаhаа мэдэхэ бэлэй?
Бадма Николаевич 1970 оной нохой жэлдэ, Эржена Батоевна 1971 оной гахай жэлдэ алтан дэлхэйн шарай хаража, эжы абаяа нилээд баярлуулhан байха.
Эржена Батоевнагай баабай, Батодоржо Рабжуевич, нютаг соогоо аргагүй хүндэтэй, олон үгэгүй, одоол алтан гартай, модошо, түмэршэ дархан байhан. Нютагайнгаа зоной ямаршье асуудалаар: «Ринчин баабай, тэргэмнай эбдэршоо, тракторни абяа гаранагүй», үгышье hаа, «энэ тэрэ түмэрни нугаршоо гү, али хухаршоо, гагнажа үгыта…» гэхэ мэтэhээ эхилээд, алишье түмэр түдэгэдэ хабаатай асуудалнуудые тэрэ дары шиидхэжэ, тэдэндэнь «хоёрдохи ами» оруулжа үгэдэг hэн. Харамтайнь гэхэдэ, 70 наhандаа хүрэнгүй, нёдондо жэл гэнтын аюулһаа боложо, хада гэртээ харяа hэн даа. Түрэhэн эжынь, Гыпылма Ешеевна, нютаг соогоо жэрмэhэн эхэнэрнүүдэй хээлиие хэм соонь оруулха, досоогоо дуншаhан, тархяараа «өөдөө» хараhан хүүгэдые баhал зүб тээшэнь заhаха, мүн тиихэдэ хониной арhа элдэжэ, холтоhон соо дэбтээжэ, тэрэнээ галай утаан дээрэ хүри улаахан үнгэтэй болгожо, утаанай, арhанай үнэр шэнгэшэhэн гуламтадаа үбэл зунгүй нютагайнгаа ямаршье наhатанда эрмэгтэй дулаахан гуталнуудые оёдогынь мартаха аалши?
Угайдхадаа, нютаг соогоо «Ара Хамнай» гэжэ нэршэhэн үйлсэдэ Эржена бидэ хоёр нэгэ шорой худхажа, нэгэ худагай уhа уужа үндыhэн лэ аабзабди, тиигээдшье энхэргэн hайхан эжынэрнай хоюулаа нэгэ ангида hураhаншье, түрэhэн үринэрөө суг хамта үндылгэhэншье, бүхы наhаараа хамагаа хэлсэжэ, бэе бэетэеэ хубаалдажа ябагшал hэн даа. Эржена Батоевнагай эжы, Дашама Гармаевна, нютаг соогоо эдеэн гартай гэлсүүлдэг, альганай шэнээн арhаар арбан захатые бүтээдэгынь хэншье гэршэлхэ даа.
Түрэhэн эжынгээ эдэ бүгэдэ бэлигынь найман дүүнэрые дахуулжа ябаhан ууган басаган Эржена абангүй яахаб? Эжынгээ «баруун гарынь» бололсожо, хани нүхэр Бадма Николаевичтаяа дүүнэрэйнгээ гарыень ганзагада, хүлыень дүрөөдэ хүргэлсэжэ табилсаhан лэ байха.
Олзын хэрэг эрхилээ
2014 оной январь hарада бага олзын хэрэг эрхилэлгэдэ Хэжэнгынгээ аймагай засаг зургаанай зүгhөө мүнгэн hомологдоно гэжэ дуулахадаа, Эржена Батоевна нүхэртэеэ бууза банша үйлэдбэрилхэ түхеэрэлгэ, тэдэнээ тарааха машина худалдан абажа, аймагайнгаа түбhөө аяар холо 70-аад модо ажаhуудаг нютагаархидаа талха, мяхаар хангаха гэhэн зорилгоёо одоошье бэелүүлжэ эхилhэн юм.
Хэлээ таhа хазама амтатайгаар бэлдэгдэhэн бууза ба баншаяа түрүүшээр Загаhатадаа, hүүлдэнь аймаг дотороо, хоёр жэлэй үнгэрөөд байхада, Улаан-Үдынгөө дэлгүүрнүүдтэ тараажа эхилээ бэлэй. Мүнөө дээрээ хүршэ болохо Хори болон Загарай аймагуудай дэлгүүрнүүдыень энэ амтатай хоолоороо мүн лэ хангана.
Бадма Николаевич Эржена Батоевна хоёрой эрхилжэ ябаhан ажалдань мүнөө дээрээ сүүдхын туршада 100-гаад гаран килограмм мяхан татагдажа, хоёр янзын котлетэ, фрикаделькэнүүдые, гурбан янзын бууза, баншануудые, буряад шүлэндэ эгээл хэрэгтэй таhалhан талха үйлэдбэрилнэ. Хүдөөдэ ажаhуудаг зондо мяхан, мяханай зүйлэй халуун эдеэн байбал, юун хэрэгтэйб даа? Тэрэнэй хажуугаар Эржена Батоевна нютагтаа байhан ажалгүй хүнүүдые ажалтай болгожо, зондоо ямар ехэ туhа хүргэнэ гээшэб?
Үдэр hүнигүй ябаhан эбтэй бүлын ажалайнь гэршэ гэхэдэ, аймаг, улас дотороо, мүн можонууд хоорондо үнгэргэгдэhэн хүдөө ажахын үйлэдбэриин тэмсээн, хуралдаан, мүрысөөнүүдтэ илажа гараhан олон тоото грамота, үргэмжэлэлнүүд ажалайнь танхимай ханануудые гоёодог.
Бэе бэеынгээ урихан харасаар юу хэхэеэ ойлгосолдохо болоhон энэ эбтэй бүлэ гурбан дангина басагадые ажабайдалай үргэн замда гаргажа байнхай. Хүдөөдэ ажаhуудаг зонойнгоо тала хаража, мяхыень байра дээрээ худалдан абажа, ямаршье холисо, нэмэлтэгүй, байгаалиин сэбэртэ тэнжэ-hэн үхэрэйнгөө мяха буйлуулжа, арад зоноо мяхан хоолоор хангажа байhан Эржена Батоевна Бадма Николаевич хоёртоо энхэргэн hайхан эжынэрээ юртэмсын гурбан зөөлэнөөр жэгнэжэ, нютаг зондоо хүндэтэй зандаа, зэлэ татама зээнэрээ харалсажа, харгы замдаа hайн олон нүхэдтэй зандаа ажабайдалайнгаа замаар үлзы хэшэгтэй дабшахыень хүсэнэб!
Цырендолгор БАДМАЦЫРЕНОВА, багша