Амар сайн, анда нүхэдни! Үнинэй тантаяа золгоогүйдөө зобошоноб. Үргэлжэ бэшэжэ байха гэһэн аад...сүлөөгүйдөөб. Сэхыень хэлэнэб. Үри хүүгэд, үбшэ хабшан, хубиин хэрэг – тоолохо болоо һаа, тоогүй олон хүлгөөн, хүдэлөөн байгаа. Теэдшье һаяхана саг оложо, сэдьхэлээ сэлмээжэ сэнгэхэеэ уран шүлэгшэдэй, хүгжэмшэдэй урилга тогтоожо, зэргэлээд оршодог Эрхүү хото ошожо үрдибэб. Аянда гараад, алхам бүхэнөө фейсбук холбоондо мэдээсэжэ байгааб.
Бууралһаа үгэ дуула...
Арбан жэлэй саана нэгэ танилсалга болоһон юм. Өөрһөө холо ахашье һаа, зосоохи ольһоороо адли хоёр ушаршоо бэлэйбди. Тиихэдэ Буряад Уласай Уран зохёолшодой холбоон байгуулагдаhаар 75 жэлэй ойн баяр тэмдэглэжэ, хаа-хаанаһаа уран бэлигтэниие суглуулаа бэлэй. Тэдэнэй нэгэн – Марк Погребинский ябаа. Эрхүү хото түлөөлжэ, элидхэл уншаһыень мүнөөшье нюдэндэм харагдаһан мэтэ байна. Уран мүрнүүдые “урадхуулаа” бэлэй. Удангүй Уран зохёолшодой холбоониие ударидагша Матвей Чойбоновой түрэһэн Зэдэ нютаг руу зүг барилган болоо. Энэ ехэ хэмжээ гүлмэрхэн ябаһан би “Буряад үнэндөө” бэшэхэ даабаритай байһан тула тэдээнтэй хамта тиишээ даралдаа бэлэйб. Гайхалтайнь гэхэдэ, ухаандам торолдоһон элидхэлэй эзэнтэй автобусто зэргэлээд һуушооб. Тэрэмни Матвей Рабдановичай дүтын нүхэр байшоо. Бүхы харгыгаа шашалдаабди. Ород уран литература, уран зураг, хүгжэм гэхэһээ эхилээд, бусадшье талаар харасамнай дүтэрхы байшоо...
Марк Погребинский, Октябрина Ешеева
Авторай гэрэл зураг
Теэдшье харилсаамнай иигээд замхашоо бэшэ, хожомынь хэдэн уулзалганууд Буряадайшье, Эрхүүгэйшье талада болоһон. Наһатайшье һаа, залуугайнгаа зали алдаагүй Марк Михайлович минии зосоо зула бадараагаа гэхэдэ болохо. Зүрхэ сэдьхэлээрээ мэдэрээшье һаа, үшөө дууһан ухамайлаагүй бодомжонуудыемни болбосоруулжа үгэһэн юм. Жэшээнь, хэнэй үхибүүн боложо түрэхэ, хаана һураха, хэнэй хани болохоһоо бүхы хуби заяан дулдыдана гээ бэлэй. Гадна үнгэрһэнөө шамалангүй, ерээдүйе таажа зобонгүй, мүнөөдэрэйхиеэ сэгнэн, гамнан ажаһууха хэрэгтэй гэжэ заажа үгөө һэн. Бусадшье һургаал заабаринуудыень сэдьхэлдээ хадагалан ябадагби, үхибүүдтээшье дамжуулдагби.
Авторай гэрэл зураг
Марк Михайлович өөрыгөө агууехэ ирагуу найрагшаб гэжэ огто бододоггүй. Мэргэжэлээрээ уран үгэдэ юрэ хабаагүй. Зүблэлтэ засагай үедэ Эрхүүгэй Радиоприёмнигуудай ехэ заводой ахамад инженер ябаһан. Хожомынь “Сибтелеком” гэжэ компаниин захиралай орлогшо боложо, наһанайнгаа амаралтада гаратараа хүдэлөө. Мүнөө 84-тэй. Хүнгэн солбон, хүхюун задарюун ябана. Үшөө түмэр хүлэгөө унаад, урагша-хойшоо табилуулна. “Лад” гэжэ уран шүлэгшэдэй болон хүгжэмшэдэй клубай одо сахюусаниинь, голынь болонхой юм.
Авторай гэрэл зураг
“Угаараа Украинаһаа гараһан еврей үндэһэнэй үри һадаһамби. Угаа уудалаад, түрэлөө бэдэржэ туршаашьеб. Теэд хашалган хамалган болон түүхэтэ үе сагуудта үбгэ эсэгэнэрни ангиин дайсан гүүлэжэ, хюдуулһан... Тиимэһээ мүрдэлгэмни таһалдашана”, - гээд, Марк Михайлович намда һанаһанаа хэлээ бэлэй. Теэдшье Погребинскиин таһалдаһан угые үргэлжэлүүлжэ ябаһан хоёр эхир хүбүүдынь байна. Абадаал адли мэргэжэл шэлэһэн Серёжа хүбүүниинь Эрхүүдэ ажаһууна. Программист болоһон Володинь Америкын Холбоото Штат руу үнинэй зөөнхэй. Харин Америкын Оттава хотодо ажаһуудаг тэрэнэй хүбүүн мүнөө нэгэ департаментые ударидажа ябана. Хүгшэн абатаяа үргэлжэ харилсажа байдаг. Фужер гэжэ француженка ханитай болонхой, Френ гэжэ басагатай, мэнэ һая хүбүүтэй болохоёо байна. Үбгэн абын һонор ухаан, холые онодог онсо шэнжэ үри һадаһадтань дамжуулагдаал даа.
Авторай гэрэл зураг
Марк Погребинскиитэй үргэлжэ бэшэлсэжэ байдагбди. Сэдьхэлээ нээжэ, сэнтэй бодолнуудаа үргэлжэ дуулгажа байдаг нүхэрни намда уран мүрнүүдээшье, элүүр энхые баримталгын талаар заабаринуудые эльгээдэг. 20-ёод жэлэй саана өөрөө йогоор бэеэ һорижо эхилһэн. Үглөө бүри 1,5 сагай туршада бэеэ “эмшэлдэг” гуримтай юм. Эгээл тиимэһээ үбшэ хабшанда диилдэнгүй ябана. Үбшэнүүд тухай дуулаха, хэлэхэ огто дурагүй. Буряадуудтал адли, муугаа дараад, һайнаа үргөөд ябадаг зантай.
Авторай гэрэл зураг
Налгай оршондо
Сүлөө сагаа ашагтайгаар үнгэргэдэг Марк Михайлович уралигта һэдэбтэй янза бүриин наһанай зониие ниилүүлжэ, “Лад” гэжэ клуб байгуулаад, дулаахан дүхэригтэ орой һүни болотор үнгэргэдэг заншалтай. Эгээл энэ нэгэ уулзалгадаа намайе урихадань, яагаад ошонгүй байхабиб даа. Дүршэл ехэтэй мэдээжэ сэтгүүлшэн Октябрина Ешеева эгэшэтэеэ хамта Эрхүү руу зорибобди. Вокзалда бидэниие тодожо абаад, Эрхүү хототой танилсуулаа. Тиихэдээ нэн түрүүн Мария Волконскаягай гэр-музей хүрөөбди. Баруун Европоһоо декабрист нүхэрөө дахажа ерэһэн үндэр түрэлтэ хатанай гэр байра, гоо һайхан хубсаһа хунар урданайнь хэбээр байгуулаатай. Хэдэн мори тэргээр фортепиано Сибирь руу шэрүүлжэ асаруулһан юм. Тэрэниинь баһал үзэсхэлэндэ табяатай. XIX зуун жэлэй ород сэхээтэдэй хуби заяан тухай элдэб бодолнууд түрэбэ.
Холоһоо ерэһэн хоморой рояль
Авторай гэрэл зураг
Авторай гэрэл зураг
Тэрэшэлэн үнэн алдарта шажанай һүмэ хүрэжэ, Валентин Распутинай, Шелеховэй, декабристнуудай хүүрнүүдые, Адмирал Колчагта зорюулһан хүшөө анхараабди.
Үни сагай түүхэ ухаандаа һэргээжэ, Агууехэ Россиин нэгэ хубинь байнабди гэһэн һайхан мэдэрэл түрөө.
Үдэшэлэн тээхэнэ “Лад” клубай гэшүүдтэй уулзажа, уран бэлигтэйнь танилсаабди. Һай һанабал, бүхыгөөрөө болодог, сэдьхэлээ сэлидэг ород үндэһэтэнэй онсо маягаар гайхан уяран һуугаа бэлэйб. Октябрина Пурбоевна бидэ хоёр баһал өөрынгөө ябуулдаг ажалтай танилсуулаабди. Саашадаа энэ клубай гэшүүд Буряадай уран бэлигтэнтэй холбоо байгуулжа, оньһон түхеэрэлгэнүүдэй ашаар харилсажа байха түсэбтэй. Дэлхэйн эрдэни зэндэмэни Байгал далайн хоёр эрьедэ байрлаһан улад бэе бэетэеэ холбоотой байял гээд, манай унаган нүхэр Марк Погребинский уряална. Уряалыень тогтоон абая!