819
Буряад хэлэ болон соёл һэргээлгын «Амар мэндэ!» түб Улаан-Үдэдэ 2017 оной январиин 17-до үүдээ сэлижэ, түрүүшынгээ хэшээлнүүдые эхилээ. Мүнөө дээрээ энэ түбтэ түрэлхи хэлэеэ шудалжа гараһан зоной тоо 1 мянгаһаа үлүүтэй болоо, тэдэнэй дунда ганса үхибүүд бэшэ, мүн томошуулшье бии.
«Амар мэндэ!» түб иимэ шэглэлээр hуралсал ябуулна:
- Буряад хэлэн – hурагшадта
- Буряад хэлэн - наhаа хүсэhэн
зондо
- Һургуулида ороодүй үхибүүдые
бэлэдхэл
- Үхибүүдые хүгжөөлгын
хэшээлнүүд
- Дуунай хэшээлнүүд
- Хатарай хэшээлнүүд
Хүн бүхэндэ тааруу тусхай программа дурадхагдадаг. Эхинһээ эсэс хүрэтэр багша дахуулан заажа, эхэ хэлээрээ харилсажа һургаха аргатай.
Алдагдажа байһан аялгата һайхан буряад хэлэеэ, соёлоо абархын тулада энэ түб байгуулагдаа. Тиимэһээ үхибүүд юрэ хэлэ шудална бэшэ, буряад арадай бүхы ёһо гуримуудтай танилсана. Арадайнгаа соёл уралиг һэргээжэ байһан “Амар мэндэ!” болбол ёһотой аршаан мэтэ алдагдаһанаа бусааха, абарха үндэр үүргэтэй.
Тиихэдэ зүбөөр буряад үгэнүүдые үгүүлжэ, үреэл уранаар хэлэжэ, буряадаар дуу дуулажа шададаг болоно. Гадна долоон хоногой туршада гурба удаа хэшээлнүүдтэ ябажа, түргэн болзорто түрэлхи хэлэеэ шудалаад гараха арга боломжо олгогдоно.
Хатарай ба дуунай «Амар мэндэ!» бүлгэмүүд уласай, бүхэроссиин, регион хоорондын болон уласхоорондын шангуудта олон удаа хүртэhэн.
«Амар мэндэ!» hургуули hурагшадтаа өөрын салин хэшээл бүхэндэнь баридаг. «Түхэриг» гэhэн саарhан мүнгэ Солбон Дондокович Лыгденов зуража үгэhэн байна. Энэ мүнгөөрөө үхибүүднай амтатай бэлэгүүдые ба элдэб янзын сертификат худалдажа абаха аргатай.
Һуралсалаа дүүргэгшэдтэ зорюулһан тусхай баяр ёһолол амаралтын “Оранж Хаус» болон «Гранд Юрта» газарнуудта эмхидхэгдэдэг заншал бии. Тиигэжэ һургуули түгэсхэһэн зондо тусхай сертификат болон амтатай бэлэгүүд барюулагдана.
Үшөө тиихэдэ “Амар мэндын” тусхай стипенди байгуулагдаатай. Буряадай гүрэнэй ехэ һургуулиин Эмнэлгын факультедтэ онсо шалгарагшадта, мүн Зүүн зүгэй дээдэ һургуулиин оюутадта энэ стипенди үгтэнэ.
"Амар мэндэ!" түбэй зурагууд
Автор: Долгор Дондокова
