Гайхамаар наратай, элшэ туяагаар билтарһан намарай үдэр Сагаан таабай уулын хормойдо оршодог Үлэгшэнэй дунда һургуулида хоморой баяр ёһолол болобо. Сагаан таабайнгаа иимэ эрид эгсэ хажалуурые, үндэр һүрөөтэйе түрүүшынхеэ хараһандал, хадата, хабсагайта нютагайнгаа һүр һүлдые жабхалан байгаалитай холбон мэдэрэн уярхада, хэды һайхам!
Ушарынь хадаа һургуу- лиин дэргэдэ мүнөө сагай бүрин эрилтээр бүтээгдэһэн спортивна талмай ашаглалгада тушаагдаба. Нютагай санаартан – Гарма лама, Алдар лама, Дуйнхор дасанай Баяр лама нэн түрүүн ном уншажа арамнайлаа.
Һургуулиин директор Б.С. Дамдинова һайндэртэ сугларагшадые үнэн сэдьхэлһээ амаршалба, удаань улаан лентэ хайшалагдаба.
- Дэлхэй дүүрэн тамиршадаараа суурхадаг Үлэгшэн нютагта иимэ ушар болохоороол болобо. Алас Дурна зүгэй һомололгын хэмжээгээр бүтэбэ гээшэ. Һаяхана, сентябриин 26-да, Дүтэлүүрэй һургуулида иимэ талмай нээгдэжэ, һурагшадта дамжуулагдаа. Захааминайхид спортивна намтараа бүри баяжуулхань гээшэ, - гэжэ аймагай захиргаанай засаг дарга С.В.Гонжитов үгэ хэлэхэдээ тэмдэглэбэ.
Арадай Хуралай депутат, Буряадай габьяата врач, Захаамин аймагай хүндэтэ эрхэтэн В.Б.Цыбиков абынгаа – Баяжаб Бадмаевичай Үлэгшэн нютагта хүдэлһэн баримтатай холбожо, баяраа мэдүүлбэ, бэлэгүүдээ барюулба.
Үлэгшэнэй хүдөөгэй һууриниие хүтэлбэрилэгшэ Б.Б.Очиров үгэ хэлэхэдээ, эрхим тамиршад байһан аха үеынгөө зониие дурдаба. Абань – Б-Ц.С.Очиров һур харбалгаар уласай чемпион болоһон алдартай бэлэй.
Үлэгшэн нютагһаа гарбалтай зоной Улаан-Үдэдэхи эблэлэй түрүүлэгшэ, Буряадай габьяата врач, медицинын эрдэмэй кандидат Ц.Д.Туртуев амаршалгаяа үргэхэдөө, эблэлэй зүгһөө спортивна 11 костюм, элдэб түхэлэй бүмбэгэ, канат мэтын хэрэгсэлнүүдые бэлэглэбэ. Өөрөө Цыбикжаб Доржиевич шатараар спортын мастерта кандидат юм.
- Эгээ суутай хүнүүдээ дурдангүй үнгэрхын аргагүй, - гээд, элитэ марафонец Владимир Цыреновые, һур харбалгаар Олимпиин 4 нааданда хабаадаһан Бальжинима Цыремпиловые, тэрэнэй аха дүүнэрые, бүхэ барилдаагаар спортын мастер Гомбо Шагдуржаповые болон бусадые дурдаба.
Аймагай Сурхарбаануудта өөрөө нэгэнтэ бэшэ илаһан Ц.С.Цыремпиловэй 4 бэрхэ хүбүүд, басаган, зээ басаган спортын түүхэдэ нэрэеэ аржытар бэшүүлээ. Цыренжаб Сономович үреэлэй һайхан үгэеэ нютагайхидтаа зорюулба.
Һур харбалгаар Ород Уласай габьяата тренер Ш.А.Хазагаевай нэрэ Буряадай булан бүхэндэ омогорхолтойгоор зэдэлжэ байдаг. Энэ үдэр Шагдар Александрович дабхар баяртай байба. Наһанайнгаа нүхэр Галина Бадмаевнатай “Хүдөөгэй эрхим бүлэ” гэһэн нэрэ зэргэдэ хүртэжэ, Москва хото шагнал абалганда ошохоор зэһэжэ байгаа юм ха.
Спортивна талмайн нээгдэхэдэ, Ш.А.Хазагаев, һур харбалгаар аймагай Сурхарбаануудай чемпион М.Д.Бадмаев, СССР-эй спортын мастер, Сурхарбаануудта оло дахин илаһан Ц.А.Очирова, Ород Уласай ниитэ эрдэм һуралсалай хүндэтэ хүдэлмэрилэгшэ Б.Д.Улзытуев, һургуулиин директорээр ажаллаһан Ж.Ц.Гармаев болон бусад эгээл түрүүлэн хүндэлэлэй һууринуудта уригдаһан байна.
Нэрлэжэ барахаар бэшэ
- Үнэндөө, Үлэгшэнэй тамиршадые бултыень нэрлэжэ, хойнонь гарахын аргагүй мэтэ юм. Эдэ бүхэли баглаа нэрэнүүд манай суута хизаар нютагаа шэнжэлэгшэ Памажаб Очировай “Буряад үнэн” Хэблэлэй байшанда 2003 ондо нара хараһан “Земля мэргэнов” гэһэн ном соо оруулагдаһан байха. Тэрэ сагһаа тамиршадай тоо хараа байса олошороо, дахинаа ном бэлдэхээр болохонь бэзэ, - гэжэ “Буряад үнэн” Хэблэлэй байшангай зүгһөө үгэ хэлэһэн эдэ мүрнүүдэй автор онсо тэмдэглээд, “Байгал” сэтгүүлэйнгээ дугаарнуудые бэлэг болгон һургуулиин директор Б.С.Дамдиновада, “Буусын һургаал” гэһэн номуудаа һууринай номой санда бэлэглээ.
Тугууд намилзаа
Энэ талмайн нээгдэхэдэ, волейбол, баскетбол, футбол, теннис наадаха дуратайшуулда одоол аятай зохисотой болобо гээшэ. Домогто Үндэр Баабай мэргэн һур харбаашадай, урилдаашадай, бүхэ барилдаашадай һүр һүлдэ үргэжэ, эршыень нэмээһэн, хүсыень батажуулһан һаа, мүнөө дээрэ дурсагдагша наадануудые “харгалзахань” хаяа? Иигээд лэ эрхимээр теннис, баскетбол наадагшад тодоржо эхилхэнь бэзэ.
Хонгоодор, һойһо, шошоолог, хатагин, хашан угуудай тугууд намилзаба.
Үлзы һайхан Үлэгшэн
нютагай
Хашан угай халуун баяр!
Шандааһаар шанга
шадалтай
Шошоологуудһаа амар
мэндэ!
Хасаг сэрэгтэ албатай
Хатагин угһаа амар сайн!
Сөөхэр, Зандан
баатарнуудһаа эхитэй
Суута һойһо угсаатан
Сагаан сэбэр сэдьхэлээрээ
Һайн һайханиие хүсэнэ!
Сайн хаанай
һамаргаанаар,
Бушагта хаанай
буһалгаанаар
Бутаран тараһан
хонгоодор
Булта байһан таанадтаа
Буян хэшэг үреэнэ!
Түнхэндэ болоһон хүүгэдэй уласай наадануудта барилдаагаар 2-дохи һуури эзэлһэн Сэнгэ Дамдиновай, дүү Сампилайнь, һур харбалгаар спортын мастерта кандидат Анна Гомбоевагай, эдир барилдаашад Баатар, Баир Мункуевуудай, бусадайшье нэрэнүүд соностоно. Эрхим эдир тамиршадта болон норматив тушааһан аха захашуулда ГТО-гой тэмдэгүүд барюулагдаба.
Үдын һүүлээр Захаамин аймагай һургуулинуудай һурагшадай волейболоор мүрысөөн болоо. “Намарай хэшэг” гэһэн выставкэ-яармаг дэлгээгдээ. “Захаамин” гэһэн арадай дуу, хатарай, “Наадан” гэһэн хүүгэдэй, “Тэрэнги” гэһэн арадай фольклорно ансамбльнууд бэлигээ гэршэлэн харуулба.
Эгээ багашуулда – бэлэг
Тамирай талмайн нээгдэхын урда нютагай соёлой байшанай газаа бага наһанай хүүгэдэй наадаха талмай мүн лэ нээгдэһэн байна. “Гэр байра болон городой оршон” гэһэн проекттэй зохилдуулан, 600 мянган түхэриг энэ хэрэгтэ һомологдоһон юм ха. Һолжоржо, гулгажа, хүл, гараа бүхэжүүлхэ, бэеэ һорихо үнгэтэ түхеэрэлгэнүүдые харан сасуу бишыхан хүүгэд тэдээн өөдэ абиржа, туршажа эхилнэ.
“Эдир наһанһаа бэеэ һорин энхэ дорюун ябаял. Бүмбэгэ, ракеткэ, сеткэ - бултанда баяр асараа. Наранай туяа, нааданай талмай найдал түрүүлжэ, илалтанууд тээшэ уряалжа, эршэдүүлнэ бэеымнай, зоригжуулна һанааемнай” – иимэ удхатай дуун сэлеэн һууринииемнай зэдэлүүлбэ.
Үнэхөөрөөшье, үлэгшэ- нэйхидтэ дабхар баяр болоо, жаа хүүгэдэйшье, жагсаһан эдиршүүлэйшье омогорхол баярые ойлгохоор.
Зэндэмэни дуутай Үндэр Баабай, жэгнээ долгитой Зэдэ гол энэ һайндэр бүтээлсэгшэдые, нютагай һургуулиин эршэтэй эрмэлзэлтэй багшанарые, һурагшадые өөгшөөн дэмжэжэ байгаал ха...
Арсалан Батуевай зурагууд