Бэе бэеэ хүндэлжэ һураха байгаабди! Тэндэхи эндэхи буряад иимэ тиимэ гэлдэнгүй! Иимэ уряал фейсбук холбоондо тараахадамни, 60 хүн зүбшөөжэ байһанаа мэдүүлээ. Зариманиинь һанамжаяа бэшээ:
Бальжин Данзанов:
- Зүб даа! Энэ юртэмсэ дээрэ хүниие хүндэлhэн, багтааhан, мууень даража, hайнииень үргэжэ ябаhан хүн арад зондоо хэрэгтэй болоод байна! Буряадайнгаа ёhо заншалаа hэргээхэ саг ерээ!
Дондок Дугаров:
- Тон зүб. Үсөөхэн арад аад, бууса буусаараа хубаараад hуухадамнай, юумэн урагшаа ябахагүй. Нэгэдэхэ саг энэл ерээд байна.
Инна Шагнаева:
- Ходо гайхадаг байгааб, юундэ манай буряадууд бэе бэеэ гамнадаггүйб, баhадаг бэ? Мүнөө саг ерээ ондоогоор хараха, наринаар олон юумэ ойлгохо...
Светлана Шойжонова:
- Инна, та тон зүб хэлэжэ байнатби сула тиигэжэ бододогби. Муугаа дараад, hайнаа үргөөд ябаял даа, буряад угсаатан.
Светлана Бунеева:
- Эндэхи, тэндэхи гэлсэhээр, гурбан тээшээ тараагдаhан манай буряад арад зон юуншье гээшэб даа?! Ухаатай, бодолгото болохоор болоол даа!!! Yгыл hаа, буряад хэлэмнай үндыхэшьегүй!
Дарима Цыбикова:
- Сагай зүрилдөөндэ арад зоной hайхан сэдьхэлhээ бүхы юумэн дулдыдаха болоно.
Фейсбугта олоной һанаа зобооһон асуудал буряадаараа үргэлжэ бодхоожо байдаг Буряадай гүрэнэй радиогой сэтгүүлшэн Ольга Намдаковае онсо тэмдэглэмээр.
Ольга Намдакова:
- Үдэр бүри аюул тухай мэдээсэл дуулгахада, уйтай байна. Сагаан-Нуурта 5 хүн, тэрэ тоодо 2 үхибүүн түймэртэ наһа бараа. Трамвай хүлеэжэ байгаа хоёр хүн машинада мүргүүлээд, бурхандаа мордоо. Прибайкалида гэртээ орхёотой гурбан хүүгэдэй багань гал дүлэндэ шатаа, нүгөө хоёрыень хүршэнь үрдижэ абараа гэхэ мэтэ сонинууд эдэ үдэрнүүдые хүлгөөбэ. Гол зэмэ - архи! Нагаса эжым хэлэгшэ һэн - шолмосой ундаар ухаагаа манатуулжа, үхэлэй харгыда гарадаг юм гэжэ... жаргалтайш гэжэ мэхэлдэг хорото уһа амандааш абалтагүй.
Баярма Сангадиева:
- Муу юумэ тоолоходо - олошорхо гэжэ нагаса эжымни хэлэгшэ hэн... Мүнөөнэй сэтгүүлшэд муу юумэ бэшэхэдээ бэрхэнүүд, тиигээд олошоржол байна.
Цыжит Будаева:
- Ехэнхи аюул архиин гэм зэмээр болодог гэжэ мэдээжэ. Бүхы муу юумэндэ хоёр жэл соо хүдэлжэ байhан Цыденов гэмтэй гэхэдэ, буруу даа. Мүнөөдэртөө архи бу уугты, буряадаар булта хөөрэлдэгты гэжэ Зарлиг буулгажархибалнь, бүхы ажабайдалнай hайжаршаха болоно гү? Хүнэй ажабайдал хүн бүхэнэй өөрын оролдолго, ханамжалгаhаа дулдыдадаг. Аймшагтай гэнтын аюулда ороhон зон, үхибүүд ямар хайратайб. Ом маани бад ме хум!