Эрмитажай захирал Михаил Пиотровский Лэгсэг ламада шудхамал хүшөө дамжуулна
Буян хэшэгэй зам заха үзүүргүй, буянта хэрэг – сэгнэшэгүй, буян хэшэгэй далай – оёоргүй. Буянта хэрэгэй жолоо гартаа бахим адхажа, бурханай боди гэгээн һургаалай ашата гэрэлээр бүгэдэ зонойнгоо һанаа сэдьхэл арюудхагша олон тоото лама санаартанай нэгэн – Хориин Анаа дасанай шэрээтэ Дарижапов Лэгсэг ламбагай гээшэ.
Анаа дасанай шэрээтэ
Һаял дүшэ хүрэжэ ябаһан Лэгсэг ламбагай онсо илгарма: шэг шарайгаараа сэбэр, үндэр тэгшэ бэетэй, гадаада түхэлдөө таарама хурдан хурса ухаатай, хатуу зоригтой, холын хараа бодолтой. Үбэр Байгалай Новопавловск һуурин тоонтотой, Хэжэнгын 2-дохи һургуули түгэсхэһэн, Ивалгын дасанай ехэ һургуулиин гүн ухаанай факультет 1999 ондо дүүргэһэн намтартай.
2005 ондо Анаа дасанай шэрээтээр томилогдоһонһоо хойшо 30- аад гаран онуудта һандаргагдаһан хори буряадуудай гол дасанай түүхэ гүнзэгыгөөр шудалаа. Энэ хэрэгтэнь Анаа нютагай үндэр наһатай М.Г. Ширапов, С.Г. Базардараев гэгшэд туһалаа. Иигэжэ Лэгсэг ламбагай дутуу дундыень дуһал дуһалаар суглуулжа, Анаа дасанаа һэргээн бодхоожо, алдар солыень, нэрэ түрыень бусааха гэһэн зорилго табиһан байна.
Тохорюугтада 60 шулуун обоо бодхоогдоо
Ехэ багшанарай гаталһан замайнь намтар бэшэгдээ, 6 хүнэй намтар бэлэн болоо.
Нигүүлэсхы туһаламжын марафон (2009 он) үнгэргэгдэжэ, Согчен дуган, 16 бурхан һэргээгдээ. Мүнөө алталмал гунгарбаа соо бурхад яларан толорон һууна.
Дасанай һандаргагдахын урда 22 хүндэ нангин шүтөөнүүдыень хадагалхыень тараажа үгтэһэн түүхэтэй. Хэдэн үедэ тэдэнь нюусаар дамжуулагдадаг байһан. Тэдэ шүтөөнэй нэгэн – алтан субарга – Yльдэргэһөө Анаа дасандаа бусаагдаа.
Энэ дасандамнай 13-һаа 23 жэлэй туршада Этигэлэй Хамба лама һууһан гээд һануулая.
Зүб даа. Бүгэдэ арад зонойнгоо аша туһаар, оролдолгоор һандаргагдаһан шулуун дасанай хажуугаар һүр ехэтэ дасан, дуганууд, субарганууд бодхоогдоо.
Анаа дасандаа яаража дүтэлхэдэм, саб сагаахан 108 субарга (иимэ субарганууд гансал Монголдо бии) сайбалдан тобойлдоно. Эдээниие ганса хори буряадуудһаа гадна ондоо отогоорхид бодхоожо, омогойнгоо һүр һүлдые үргэжэ, хии мориёо дээшэнь хиидхүүлжэ, уг изагуурайнгаа таһаршагүй холбоо хэтэ мүнхэдөө байгуулжа, Лэгсэг ламын туһаар саглашагүй буян олоһонииень дамжаггүй.
Жэл бүхэндөө 108 субаргын уншалга, үргэн дэлисэтэй наадан үнгэргэгдэдэг. Энэ жэл олон лама санаартанай хабаадалгатай һандаргагдаһан шулуун дасан дотор бүмбэ нюугдаа.
Хорёо соонь олон зоной багтахаар дасан соо орожо, уран гоёор шэмэглэгдэнхэй алтан гунгарбаа соо һууһан бурхадта шүтэн мүргэхэш.
Тэндэл һая бодхоогдоһон Ногоон Дара Эхын дуган түүхэтэ ушаралтай холбоотой. 1873 ондо аяншалжа ябаһан 2 дугаар Александр хаанай хүбүүн Алексей Анаа дасанай Согчен дуганай баруун талада нээгдэһэн хүшэгын саана үлгөөтэй ородой хаашуулай, тэрэнэй тоодо эсэгынгээ дүрэ хаража, тон ехээр гайхаһан, уярһан гэдэг. Яаража ябаһанаа мартаад, эндэ һэеы гэр соо үнжэһэн. Тэрэ үеын шэрээтэ Алексейһээ Сагаан Дара Эхын ордон бодхоохо тухайгаа зүбшөөл гуйгаа. Уданшьегүй тэрэнэй һууһан һуурида Сагаан Дара Эхын ордон бүтөө (30-аад онуудта тэрэнь һандаргагдаа).
2017-2018 онуудта Лэгсэг ламын оролдолгоор «…эмүнэ зүгэй Будаланай оройдо Эрдэнитэ сагаан агын дотораа элдэб зүйлэй бүжэг еэр сагуугша…» Ногоон Дара Эхын һаргама һайхан дуган бодхоогдоо. Тэндэ орожо, зальбаран шүтэхэш. Саашаа найман отошонорой дуган орожо, эмшэн, аргашан бурхадтаа мүргэжэ, сэдьхэлээ ханаанабди.
Анаа дасан Гомбо сахюусантай. Гомбо сахюусантай дуган бүтэжэ эхилэнхэй.
Романовтанай уг изагууртай холбоотой
1764 ондо 2дугаар Екатерина хатанай зарлигаар Даши-Доржи Заяев Зүүн Сибириин ба Забайкалиин хизаарай түрүүшын Бандида Хамбаар томилогдоо. Даши-Доржи Заяев олон тоото делегацитай (Хориин тайшаа Ринчин Шодоев ошолсоһон) Санкт-Петербург ошоо. Хатан тэдэниие хүндэтэйгөөр угтажа абаад, өөрынгөө шудхамал хүшөө бэлэглэһэн ха. Тэрэ хүшөөнь Анаа дасанай Согчен дуганай баруун талада һуурияа эзэлээ.
Хори буряадуудай ород хаашуултай тогтоһон холбоо барисаан 1 дүгээр Пётр хаанда Москва гуйлтаар ошоһонһоо эхитэй. 1728 ондо Пётр хаан хорёорхиндо 11 туг, 1837 ондо Николай хаан 14 алтан туг 11 эсэгын толгойлогшодто дамжуулаа. Императорнууд хаан шэрээгээ эзэлхэдээ, өөһэдынгөө гоё портредүүдые Анаа дасанда Эрхүүгэй губернатораар дамжуулдаг байгаа. 1917 - 1937 онуудта бүхы юумэн үгы хэгдээ.
Yнгэрһэн сагай түүхэ һэргээн бодхоохын тула Анаа дасанай шэрээтэ Лэгсэг лама архивай дансануудые шэнжэлжэ, «Дэмбэрэлтэ хэрэгүүд зонойм сэдьхэлдэ дурсагдан мүнхэрэг» гэһэн түсэл зохёон бэелүүлээ. Екатеринын шудхамал хүшөө Санкт-Петербургһаа асарха талаар хэхэ ажалыень Ородой Холбоото Уласай Буддын шажанай заншалта Сангхын толгойлогшо Бандида Хамба лама Дамба Аюшеев дэмжэжэ, адис хайрадаа хүртөөгөө.
Иигэжэ август һарада Буддын шажанай Росси гүрэндэ баталагдаһаар 225 жэлэй ойдо зорюулжа, Санкт-Петербургда үндэр хэмжээнэй үйлэ хэрэг үнгэрөө. Эрмитаж соо губернаторай уялга дүүргэгшэ А.Д. Бегловой, түс музейн директор М.Б. Пиотровскиин, Петербургын дасанай шэрээтэ Б.Б. Бадмаевай, мүн бэшэшье мэдээжэ зоной хабаадалгатайгаар баяр ёһололой оршон соо түүхэтэ хэрэг үнгэрөө. Эрмитажай директор М.Б. Пиотровский Анаа дасанай шэрээтэ Лэгсэг ламада Екатерина хатанай шудхамал хүшөө барюулаа.
Зарим зон хаашуулай портредүүдтэ, Екатеринын хүшөөдэ мүргэхэ бэшэ ха юмбибди гэжэ һанажашье болохо. Зүгөөр буурай сагай амисхаалай хүсөөр үнгэрһэн, мүнөө, ерээдүй үе сагые холбоһон таһаршагүй утаһан шэрээтымнай хүсөөр татагдаа гэхэдэ, алдуу болохогүй. Энээнэй үшөө нэгэ гэршэ гэхэдэ, Хориин харьяата газараар аяншалһанаа бусажа ябаһан үндэр түрэлтэ Алексейн, цесаревич Николайн тогтоһон, амарһан, угтамжа болоһон газарнуудта субаргануудые бодхоожо эхилээ. Нэгэниинь Доодо-Анаагай харгын хажуудахи субарга замшадай анхарал татадаг.
Һаяын үдэрнүүдтэ Буряад Уласай Засагай газарта засаг түрэ баригшадай хабаадалгатайгаар Санкт-Петербургда болоһон үйлэ хэрэгүүдэй дүнгөөр презентаци хараалагданхай.
Хори нютагайнгаа үйлэ хэрэгүүдтэ эдэбхитэй хабаадагша
2010-аад онуудта Хориин 1-дэхи һургуулиин «Наследие» гэһэн түсэлэй ёһоор, Буряад Уласай Толгойлогшын орлогшо Б.Б. Жамбаловай ба тус һургуулиин захирал Л.А. Цыдыпдашиевагай үүсхэлээр «Карта природного и культурного наследия Хоринского района Республики Бурятия» гэһэн тон туһатай карта зохёогдожо эхилээ һэн.
Тус карта дээрэ байгаалиин ба соёлой баялигуудһаа гадна Лэгсэг ламын туһаламжаар Хори аймагай бүхы нангин шүтөөнэй газарнууд тэмдэглэгдээ юм. Авторынь, редакторынь Эрхүүгэй гүрэнэй техническэ университедэй техническэ эрдэмэй доктор, профессор Л.А. Пластинин (тус һургуулиин шаби) картографическа түбтэ карта хэблүүлэн гаргаһан гээшэ. Иимэ карта Буряад Уласта гансал Хоридо бии болоһон.
Лэгсэг ламбагай эбтэй эетэй гэр бүлэтэй. Эржена нүхэртэеэ гурбан баатар хүбүүдээ, басагаа буряад ёһоор хүмүүжүүлдэг. Ехэ хүбүүниинь Екатеринбургын юридическэ ехэ һургуули дүүргээ.
Тобшоор хэлэхэдэ, иимэл даа, арад зоноо гэгээрүүлэн, буянай арюун замаар хүтэлэн, эсэшэ сусашагүйгөөр ашата хэрэг үйлэдэн ябадаг манай шэрээтэ Лэгсэг ламбагай.
Ксения ГАРМАЕВА,
Любовь ЦЫДЫПДАШИЕВА