876
Борис Будаев Косэй Акаиси хоёр дэлхэйн абаргын нэрэ хүндын түлөө барилдажа байна
Борис Будаевай дэлхэйн абарга болоһоор, 30 жэл үнгэрбэ. 1989 оной намар Швейцариин Мартинье хотодо болоһон дэлхэйн чемпионадта Борис Будаев түүхэтэ илалтаяа туйлаа бэлэй.
68 килограмм хүрэтэр шэгнүүртэй барилдаашад сооһоо Япониин Косэй Акаиси, мүн манай Борис Будаев гэгшэд абаргын нэрэ хүндэдэ хүртэхын түлөө түгэсхэлэй шатада барилдаа һэн. Будаев 32-той, харин Акаиси 24-тэй ябаа. Тэрэ үе тухайгаа Борис Дугданович иигэжэ дурсана:
- Дэлхэйн чемпионой нэрэ зэргэдэ хүртэхын түлөө нилээд ехэ хүсэ гаргааб, хүлһэ адхааб. Зорилго табяад лэ, тэрэнээ бэелүүлхэ гэжэ һөөргөө халташье сухарингүй, шадал соогоо оролдоолби даа. 1981 ондо дэлхэйн чемпионадта хабаадаха боложо байһан аад, шадаагүй һэмби. Тиигэжэ 8 жэл болоод, одоошье абаргын соло дуудуулаалби даа. Ендэр дээрэ зогсоод, шагналаа абажа байхадаа, хүн гээшэ хүсэлөө бэелүүлхын түлөө бии шадалаараа шармайгаа һаа, заатагүй һанаһандаа хүрэхэл юм байна гэжэ бодоо бэлэйб.
Борис Будаев Буряадай түүхэдэ түрүүшын дэлхэйн абарга гэжэ мүнхэрхэл ёһоороо мүнхэрхэ. Теэд 30 жэл соо тэрэнэй туйлалта дабтаха хүн гараагүйнь ямар ушартай гээшэб гэжэ өөрһөөнь асуубабди:
- Мүнөөнэй залуушуул эрилтэ ехэтэй болонхой. Салин хүлһэ, гэр байра үгэгты гэнэ. Һайн дүнгүүдые харуулаал һаань, эдэ бүгэдэ ерэхэ ха юм. Абьяастай хүбүүдые дэмжээд, алиш талаһаань хангаад, һорилгыень һайса хүүлээд байгаа һаа, амжалтада хүрэхэл байха.
Ородой Холбооной спортын габьяата мастер Борис Будаевай дэлхэйн чемпион болоһоор, 30 жэлэй ойдо зорюулагдаһан уласхоорондын тэмсээн эдэ үдэрнүүдтэ Улаан-Үдэ хотодо боложо үнгэрбэ.
Тэрээндэ Монголой барилдаашад эгээл олоор илалта туйлаа гэжэ уридшалан дуулгаад, дүнгүүд тухайнь тодорхойгоор 22-дохи нюурта уншагты гэжэ уряалнабди.
Борис Будаевай хубиин жасаһаа
Цырен НАЙМАНОВ
