​​Эхэнэрнүүдэй дунда боксоор дэлхэйн чемпионат: амжалтын нюуса

Санжи Батуев

12 үдэрэй туршада Буряад Уласта үнгэргэгдэһэн тамирай түүхэтэ хэмжээ ябуулга тухай Волонтёрнуудай штабай командир Санжи Батуев хөөрэнэ.

- Санжи, хэһэн ажал тухайгаа тобшохоноор?

- 2018 оной һүүл багта Буряад Уласта чемпионат үнгэргэгдэхэ гэжэ мэдэгдээд, байгша оной февраль һараһаа бэлэдхэлэй ажал эхилээ. Долоо һарын туршада чемпионат эмхидхэлгын ехэ гэгшын ажал хэһэн байнабди. Энэ үедэ эдеэлхэ, унтаха тухай мартагдаа.

- Аяар февральһаа гү?

- Эгээл эршэтэйгээр, үргэһэ нойр, эдеэ хоол тухай мартажа, августын һүүл болон сентябрь һарада бэлэдхэл ябуулагдаа.

- Шанга даа! Хэр олон волонтёрнууд хабаадааб?

- Ехэ һургуулинуудай, дунда мэргэжэлэй һургуулинуудай оюутад – дүн хамта 209 хүн – волонтёрнуудай штабай бүридэлдэ ороо. Шэлэн абалгын шата дабаһан хүнүүд дэлхэйн чемпионадта хүдэлөө. Мүрысөөнэй үедэ бүхы тамиршадта, һоригшодто, хари гүрэнүүдэй, Ород гүрэнэй командын түлөөлэгшэдтэ туһа хүргэхэ эрхэдэ хүртэхэеэ хүсэһэн залуушуулда хэдэн эрилтэ табигдаа. Нэгэдэхеэр, оюутад заатагүй англи хэлэ мэдэхэ ёһотой. 75 гүрэнэй түлөөлэгшэд ерэхэ гэжэ хүлеэгдэбэшье, 57 гүрэнэй тамиршад Буряадта буугаа. Тэдэнэр ехэнхидээ англи хэлээр харилсаа. Хоёрдохи эрилтэнь хадаа залуушуул волонтёрой дүй дүршэлтэй байха ёһотой. Удаань тэдэнэр али онсо ушарай тохёолдобол, мэгдэн, һагдангүй асуудал шиидхэжэ шадаха гү гэһэн шалгалта гараһан байна. Тиихэдэ хуули хамгаалгын болон бусадшье албан шалгалтануудые үнгэргөө гээд тэмдэглэлтэй. Гэхэтэй хамта, элүүрые хамгаалгын һалбариһаашье эрилтэнүүд шанга байгаа, үбшэнһөө һэргылһэн тарилгануудай үгы һаань, оюутад чемпионадай волонтёрнууд болохо эрхэгүй боложо, орондонь ондоо хүнүүд абтаа.

- Хэды бригада манай Буряадта бууһан айлшадтай ажал ябуулааб?

- Бригадаар хубааржа бэшэ, харин шэглэлнүүдээр ажал ябуулагдаа. Нэрлэбэл, зошод буудалнууд, аэропорт – угталган, үдэшэлгэн, ФСК соо ажаллахаһаа гадна, бүхы Улаан-Үдөөр гид- волонтёрнууд ябаа. Үшөө март һарада боксын уласхоорондын федерациин (АIBA) түлөөлэгшэд зошод буудалнуудые тусхай эрилтээр шэлэһэн байна. Харгыда ябаха, зошод буудалда байрлаха талаар алдуу эндүүнүүд гараагүй. Гансал Элеватор дээрэ машинанууд олоор суглараа ааб даа. Теэд манай эндэхи машинануудай пробко тэдээндэ юуншье бэшэ. Мүрысөөнүүдэй үедэ албангууд энэ байдал хёрхоор хинажа байгаа.

- Бүхыдөө хэды айлшад Буряадта буугааб?

- 350 тамиршад, харин бүхыдөө 800-гаад хүн ерэһэн байна. Тэдэнтэй долоон хүнһөө бүридэһэн бүлэг волонтёрнууд ажал ябуулаа. Ондо- ондоо яһатанай түлөөлэгшэдтэй уулзахада, хододоо һонирхолтой, дүй дүршэл, эрдэм мэдэсэеэ үргэдхэнэш! Хари гүрэнүүдэй бүхы түлөөлэгшэд значогуудые бэлэглээ. Манай нэгэ волонтёр 15 значок суглуулһан байна. Тиимэһээ манай оюутад өөрынгөө ажалаа дүүрэн бэелүүлээ гэжэ ойлгоноб.

- Хүнэй хэжэ ядахаар бэшэ ажал байгаа гү?

- Оройдоо ядалдахаар бэшэ! Түрүүшын үдэр танилсалга, дадалга. Эндэл бүхы дутуу дунданууд элирээ, ехэ хүлгөөтэй байгаа. Ямар талын ажал гуримшуулхаб, эршэдүүлхэб гэжэл ойлгоходоо, волонтёрнуудшье, бишье урматай байгааб. Шухалань гэхэдэ, айлшадтамнайшье һайхашаагдаа. Баяр баясхалангай оршондо үнгэрөө.

Үндэр хэмжээндэ үнгэрһэндэнь эзэдшье, айлшадшье баяртай

aiba.org

- Эгээл мартагдашагүй үзэгдэл?

- Байгалай эрьедэ амаралтын үдэр – ёохор, гоё һайхан тоглолто, Буряад Уласта ажаһуудаг арадуудай заншалта эдеэ хоол, мори урилдаан. Байгаалишье энэ үдэр бүхы баялигаа дэлгэжэ харуулаа гэжэ тэмдэглэхээр.

- Ямар гүрэнэй айлшад һонирхол татааб?

- Би айлшадаар сэхэ харилсажа байгаашьегүй һаа, волонтёрнуудта туһа хүргэхэ үедөө танилсааб, олонтойнь нүхэсөөб. Тиихэдэ Бурунди тухай балай мэдэхэгүй байшооб. Тэндэ хатарха дуратай зон ажаһуудаг гэжэ мүнөө мэдэхэ болооб. Казахстан, Микронези.

- Микронези?

- Тон зүб. Микронези тухай юушье мэдэхэгүй байһанаа ойлгооб. Тиихэдэ Гондурасһаа ерэһэн басаган Инстаграм сүлжээндэ мүнгэ суглуулжа, мүрысэхэеэ ерээ. Тэрэнэй Улаан-Үдэдэ квартирада байрлаһыень бэдэржэ, «Бурятия» зошод буудалда оруулаабди. Удаань тамирша басаганда туһалһан һоригшыень олообди.

- Мүнөө ямар мэдэрэл түрэнэб?

- Буряад Уласайнгаа түлөө омогорхожо байгаабди. Тиихэдэ манай команда (волонтёрнууд – авт.) энэ ажал хэжэ шадаа гэжэ ойлгоходоо, бүришье һүрөөтэй. Дэлхэйн мүрысөөнэй үнгэрһэнэй удаа түрүүшын үдэрнүүдтэ энээниие үшөөшье дүүрэн мэдэрнэгүйш. Харин энэ чемпионат АIBA-гай эмхидхэһэн эрхим чемпионадай нэгэн гэжэ нэрлэгдэхэдэнь сэдьхэлээ хөөрэжэ, бахарханаш - үргэһэ нойр тухай мартажа, дэмы ябагдаагүй гэжэ ойлгонош!

- Хэды наһатай волонтёрнууд мүрысөө эмхидхэлгэдэ, үнгэргэлгэдэ хабаадааб?

- Тэдэнэр дунда зэргэнь 18 наһатай залуушуул, ехэнхинь нэгэдэхи, хоёрдохи курсын оюутад.

- Юугээ хэлэнэт?! Гайхалтай! Иимэ залууханууд аад, аргагүй ехэ ашаа ээм мүр дээрээ тээжэ гараһандатнай, Буряадайнгаа нэрэ хүндэ үргэһэндэтнай баяр хүргэнэб.

Баримта:

Санжи Батуев «гүрэнэй-муниципальна хүтэлбэри» гэһэн мэргэжэлээр ВСГУТУ дүүргэнхэй. Залуу хүбүүн Буряад Уласай Залуушуулай түбтэ хүдэлһэн, оюутадай хүтэлбэриин түрүүлэгшын орлогшо, волонтёрой дүй дүршэлтэй.