​​Абаргын үүсхэл

Борис Будаевай дэлхэйн чемпион болоһоор 30 жэлэй ойн баярта зорюулагдаһан уласхоорондын мүрысөөн Улаан-Үдэдэ үнгэргэгдэбэ. Буряадай түүхэдэ мүнхэрһэн тэрэ амжалтыень тус хэмжээ ябуулгал һануулба. Абаргын түрэһэн нютагташье, Буряадай ниислэлдэшье энэ ушарта дашарамдуулагдаһан ондоо юумэнэй болоогүйнь харамтай.

Мэдээжэ тамиршан энэ мүрысөөгөө 27-дохи жэлээ үнгэргэнэ гээд һануулая. 2018 ондо мүнгэнэй хоморһоо боложо эмхидхэгдээгүй. Гэхэтэй хамта, энэ мүрысөөн уласхоорондын болон Ородой барилдаанай эмхинүүдэй тобьёгто бүридхэгдөөдүй. Тэрэ зундаашье, намартаашье, хабартаашье үнгэргэгдэхэ аргатай. Энэнь тон муугаар нүлөөлнэ. Жэшээлбэл, мүнөө жэл Монголой, Казахстанай болон Ород гүрэнэй оройдоол табан можо, хизаарнуудай түлөөлэгшэд хабаадаа. Монголой тамиршад олоор ерэжэ, хабаадагшадай тоо 195 хүн болоо.

Эндэ 21 наһа хүрөөдүй залуу тамиршад хабаададаг заншалтай юм гээд һануулая. Тиимэһээ ерээдүй найдалнууд мүнөө сагта ямар дүй дүршэлтэй болоноб гэһэн харалга болоно гэжэ хэлэбэл, алдуу болохогүй.

Өөрын хибэс дээрэ Буряадай тамиршад 12 медаль абажа шадаа. Тэрэ тоодо хоёр тамиршан чемпион болоһон байна. Эдэ хэд бэ гэбэл, Амгалан Бакшеев, Буянто Шадапов болоно.

Амгалан Бакшеев 97 килограмм хүрэтэр шэгнүүртэ финальна уулзалгада Монголой тамиршанда шүүгдэжэ байтараа, нюрган дээрэнь хэбтүүлжэ шадаа. Мүн Буянто Шадапов 79 килограмм хүрэтэр шэгнүүртэ Эрхүү можын тамиршаниие илажа гараа.

Алтан медальнуудта хүртэхын түлөө тулалдаануудта Буряадаймнай Дмитрий Жаргаланов, Тумэн Бодиев гэгшэд азагүйдөө. Финалда гараһан Ананда Дашиев ба Алдар Мункуев гэгшэд 10 гаран очкогоор шүүгдэжэ, сугларагшадай болон һоригшодой һанаа ехэтэ зобоогоо.

Монголой тамиршад Улаан- Үдэ олоор ерэжэ, гурбан алтан медальтай гэртээ бусаа. Мүн Эрхүү можын тамиршад хоёр дахин түрүүлжэ гараа. Казахстанай болон Тыва Уласай барилдаашад нэгэ-нэгэ дахин илалтын баярые бэе дээрээ үзэбэ.

2020 ондо тус хэмжээ ябуулга болохо гү, али үгы гэжэ хэншье мэдэнэгүй.

Борис Балдановай гэрэл зураг