​​Уран гартан урматай

Саха-Яхад Уласта «Арсалан заанай һоёо дээрэ» гэһэн заншалта харалга-мүрысөөн намарай дунда һарын 17-20-ой үдэрнүүдтэ үнгэргэгдэһэн байха юм. Тэндэ Буряадай уран гартан Бато-Мүнхэ Чимитов илажа гараад, Гран-при шанда хүртэжэ, 100 мянган түхэригөөр урмашуулагдаа. Энэ ахатамнай Буряадтаа яһан дээрэ һиилэжэ, зуража шадаха ори ганса хүн байна.

Эндэ намайе обёоржо сэгнэхэ гэжэ оройдоо һанаагүйб. Би иишээ анха удаа ерээб. Шан абаһандаа ехэ баяртайб, эндэл, арсалан заанай (мамонтын) орондо, минии талаан сэгнэһэндэнь баяр урматайб, - гээд, Бата-Мүнхэ Балтуевич Яхадай сониндо хөөрэһэн байха юм.

Уран гартан тус харалга-мүрысөөндэ өөрынгөө зургаан бүтээл дурадхаа. Арсалан заанай һоёо дээрэ Хамба лама Даша-Доржо Этигэловэй зураг, Чингис хаанай дүрэ, монголшуудай шатар, буряад хутага, Алан Гуа эхын дүрэ зураг бүтээгээ.

Бата-Мүнхэ Балтуевич хадаа Сэлэнгэ аймагай Тохой нютагта түрэһэн. Дунда һургуулияа түгэсхөөд, Абрамцевай нэрэмжэтэ Уран бүтээлэй училищида «яһан дээрэ һиилэгшэ» гэһэн мэргэжэлээр һуралсажа гараа. Удаань уран зураашаар ажаллаһан, тиихэдэ гарай бэлэг бүтээдэг цех байгуулаад хүдэлөө. Зохёохы ажалайнгаа үргэн харгыда олон тоото уласай, можо хоорондын, бүхэроссиин болон уласхоорондын хэмжээнэй харалга- мүрысөөнүүдтэ нэгэтэ бэшэ хабаадаһан.

ysia.ru cайтһаа гэрэл зураг абтаба