БГСХА-гай Хүдөө ажахын ажалшадай мэргэжэл дээшэлүүлгын дээдэ һургуулида хониной арһа элдэжэ һургана. Гадна арһаар саарһа яагаад хэхэб гэжэ заана. Энэнь тон һонирхолтой.
Монголһоо ерэһэн Гантүмэр багша заншалта ёһоор арһа элдэхэ онол арга заана. Тэрэнэй шадабаринь хүн зоной һонирхол ехэтэ татана. Гантүмэр багшын хэлэһээр, химиин бодос хэрэглэнгүйгөөр арһа элдэжэ, саарһа хэхэ гээшэ ехэ һайн талануудтай. Байгаалида ямаршье хохидол асарнагүй ха юм.
Буряадай графикын дизайнер Дмитрий Галсан энэ арга үндэрөөр сэгнэбэ. Арһаар хэһэн саарһан тэрээндэ эльгэн саарһа (пергамент) һануулба. Энээнээр ном гадарлаа һаа, ехэ һайн материал болохо гэжэ тэрэ тэмдэглээ. Иимэ эльгэн саарһа сувениртэ хэрэглэжэ болоно. Жэшээнь, арһан саарһан дээрэ угалзатуулһан монгол бэшэг ехэ үнэ сэнтэйгээр харагдаха. Хонинойнгоо арһа хаяжа байнхаар иигэжэ элдэжэ, эд болгожо, ашаг олзо олохо нэгэ арга нээгдэнэ бшуу. Нооһо болбосоруулха, арһа элдэхэ, сагаан эдеэ бэлдэхэ аргануудые һэргээхэ ажал “Тэнгэриин бэшэг” гэһэн монгол уран бэшэлгын ниигэмлигэй түрүүлэгшэ Маргарита Дамбаева ехэ эдэбхитэй эрхилдэг болоо. Энэ ажалдань Буряад Уласай Хүдөө ажахын болон эдеэ хоолой яаман дэмжэлгэ үзүүлнэ.
Буряад Уласай Хүдөө ажахын болон эдеэ хоолой яаманай гэрэл зураг