Ехэ-Нугын һургуулиин буряад хэлэнэй багша Саяна Цыремпиловагай нээмэл хэшээлэй үедэ
«Элһэн Венеци» гэжэ нэршэһэн Хяагта һайхан аймагта буряад хэлэнэй багшанар урда долоондо уулзажа, удха ехэтэй хөөрэлдөө хээ. Д.Банзаровай нэрэмжэтэ БГУ-гай ба Болбосоролой болон эрдэм ухаанай яаманай үндэһэн хэлэ сахин хүгжөөхэ талаар хоёр түбэй эрдэмтэ багшанар, мэргэжэлтэд энэ уулзалга эмхидхэһэн байна.
Хяагта хотын 2-дохи дунда һургуулида аймагай түбэй, Шара-Голой, Ехэ-Нугын багшанар, ниислэлһээ ерэһэн айлшад нээмэл хэшээлнүүдые үнгэргөө. Удаань Хяагта хотын, Алтайн, Энхэ-Талын, Мөөрөөшын багшанар, Улаан-Үдэһөө ошоһон хүүгэдэй сэсэрлигүүдэй хүмүүжүүлэгшэд мастер-классуудые харуулжа, сугларагшадые урмашуулаа. Хэжэнгын, Ахын һургуулинуудай, БГУ-гай багшанар хяагтынхидтай дүй дүршэлөө хубаалдаа.
Үдын хойно аймагай болон сомонуудай нютагай засаг баригшадай, олониитын түлөөлэгшэдэй хабаадалгатай бага хурал эмхидхэгдэһэн байха юм. Хяагта аймагай һургуулинуудта буряад хэлэ заалга тухай элидхэл хэгдээ. 23 һургуулиин 22-тонь түрэлхи хэлэн заагдабашье, гурбан һургуулида (Алтайн, Ехэ-Нугын, Энхэ-Талын) түрэлхи хэлэн гээд үгтэнэ. 19 һургуулида гүрэнэй хэлэнэй программаар һурагшад буряад хэлэ шудална.
Үнгэрһэн һуралсалай жэлдэ хүүгэдэй сэсэрлигүүдтэ буряад хэлэн дээрэ хүмүүжүүлхэ тусхай бүлгэмүүд уласаймнай аймагуудаар нээгдэжэ эхилэнхэй. Хяагта аймагай 6 эмхидэ иимэ бүлгэмүүд бии болоо. Үглөөнһөө үдэшэ болотор үхибүүдтэеэ буряадаар хөөрэлдэн хүмүүжүүлдэг мэргэжэлтэдэй салин 15 хубяар ехэ болгогдонхой, бултандань түлэгдэнэ.
Олоной хабаадаһан суглаан дээрэ шиидхэгдээгүй асуудалнууд зүбшэн хэлсэгдээ. Буряад хэлэнэй кабинедүүдые шэнэлхэ, сагтаа тааруу хэрэгсэлнүүдээр тэдэниие заатагүй хангаха хэрэгтэй гэжэ һургагшад хэлэнэ. Үшөө нэгэ орёо асуудал – багшанарые бэлэдхэл. Илангаяа хүүгэдэй сэсэрлигүүдтэ буряад хэлэ зааха һургагшад дуталдана.
Бага хуралда хабаадалсаһан аймагай багшанар, аймагай засаг дарга, Бүгэдэ Буряадай үндэһэн соёлой эблэлэй Хяагтын аймагтахи һалбариин түлөөлэгшэд үхибүүднай буряад хэлэеэ үзэһөөрөө үзэдэг байха гэжэ найдуулаа. Харин өөһэдынгөө нютаг аялгаар үдэр бүри хөөрэлдэжэл байнабди, байхашьебди гэбэд. Түрэл хэлэеэ хүгжөөхэ талаар ажалаа улам бүри эршэтэй болгохобди гэжэ хяагтынхид холын бодолтойгоор һанамжална.
Оюна Забановагай гэрэл зураг