​​Хотын үдэр хэзээб?

Улаан-Үдэ хотын «түрэһэн үдэр» хэзээ тэмдэглэхэб гэһэн тусхай асуулта хэгдэбэ. Тэрээндэ хабаадаһан 21 мянган хүнэй һанамжаар тус һайндэр намар бэшэ, зунай эхин һарада эмхидхэгдэжэ байгаа һаань дээрэ.

Сентябриин 13-һаа Буряадай ниислэл хотын гурбан хороогой захиргаанда, Хүүгэдэй уран бэлигэй байшануудта, 9 һургуулида, хүүгэдэй 9 сэсэрлигтэ, тусхай мэргэжэлэй дунда ба дээдэ һургуулинуудта һанал хуряалгын хайрсагууд табигдаһан байгаа. Хоёр һарын туршада үнгэрһэн асуултын дүнгүүдые ноябриин 15-да Улаан-Үдэ хотын мэр Игорь Шутенков согсолбо. Тэрэнэй хэлэһээр, элдэб наһанай, элдэб ондоо мэргэжэлэй хүнүүдэй - үхибүүдэй болон гэртэхинэйнь, оюутадай, Хотын үдэртэ хүдэлдэг зүжэгшэдэй – һанамжа мэдэхэнь шухала байгаа.

Тиигэжэ һанал хуряалгада хабаадагшадай олонхинь (80%) Хотын үдэр зун, тодорхойлходо, июнь соо тэмдэглэхэ хэрэгтэй гэжэ тоолоно. Зунай эхин һарада гурбан шухала һайндэрнүүд – Хүүгэдэй эрхэ хамгаалгын үдэр (июниин 1), Россиин үдэр (июниин 12), Дурасхаалай ба гашуудалай үдэр (июниин 22) – болодог ушарһаань Улаан-Үдын түрэһэн үдэр һарын гурбадахи субботодо тэмдэглэхэ тухай шиидхэбэри гаргагдаба.

Байгша ондо Хотын үдэр сентябриин 7-до эмхидхэгдээ. Шэмэрүүн һалхитай, бороотой байһанһаань боложо, үсөөхэн зон һайндэртэ хабаадаа. Тиимэһээ Игорь Шутенков Хотын үдэр шэлжүүлхэ тухай һанамжалһан байна.