875
Ажаһуугша бүхэндэ хабаатай али олон асуудалнуудта Алексей Цыденов дэлгэрэнгы харюу үгөө
Хүгжэлтэ үгэһэн хүрэнгэ
Алас Дурнын тойрогой бүридэлдэ ороhонойнгоо ашаар һайн хубилалтанууд бии гү гэһэн асуудалда уласай толгойлогшо удаан бодонгүй сэхэ хэлэбэ: “Ашаг бии. Жэшээнь, Буряадай хүгжэлтэ ехэтэй һалбаринууд руу шэглүүлэгдэһэн Алас Дурнын субсиди уласай хүгжэлтэдэ түлхисэ үгөө. Мүнөө дээрээ энэ программаар аяар 23,6 млрд. түхэриг ашаглагдаад байна. Гадна хүдөө һууринуудай соёлой гуламтануудые барилгада болон һэльбэн шэнэлэлгэдэ хүрэнгэ ерээ. Үшөө тиихэдэ олзын хэрэгүүдые дэмжэхэ арга боломжо бии болоо. Яруунада Озёрнын ГОК хүдэлжэ захалба”.
Гэр байрагүй үлэгшэд тухай
Мүнгөө үгөөд, гэр байрагүй үлэһэн зоной тоо Буряадта 1,5 мянга болонхой. Тэдэниие Алексей Цыденов анхарал дороо абанхай. Мэхэлүүлһэн уладай тоо дээшэлхэгүйнь тулада байгша оной эсэс болотор тусхай жаса байгуулагдаха юм. Энэ жаса Ипотечнэ корпорациин дэргэдэ ажалаа ябуулха болоо.
Үри нэхэбэри
“Молоко Бурятии” байгуулга Кабанскын ажаһуугшадай урда ехэ үри суглууланхай. Мүнөө дээрээ тэрэнь 16,5 сая хүрэнэ.
Энэ байгуулгын үринь “үһэнһөө ехэ” гээд, Алексей Цыденов ойлгуулна. Гүрэнһөө туһаламжа хоёр удаа абабашье, байдалынь хубилаагүй. Хэрбэеэ түрүүн 70 сая түхэриг дамжуулагдаа һаань, хожомынь аяар 250 сая түхэриг үгтэһэн байна. Мүнөө дээрээ тус байгуулга хүрэнгэ оруулагшые бэдэржэ байнхай. Теэдшье оньһон түхеэрэлгэнүүдыень шуран бэрхэ хүнэй гарта дамжуулжа болохобди гэжэ уласай толгойлогшо дуулгаба.
Агуу Илалтын ойн баярта
Агуу Илалтын 75 жэлэй ойн баяр ойртоо хүрэбэ. Энэ һайндэртэ зорюулһан зураглалнууд “Бурятия” сониндо һүүлэй хоёр жэлэй туршада үргэлжэ барлагдана. Эгээл тиимэһээ сониной сурбалжалагша Баясхалан Дабаин Алексей Цыденовтэ гуйлтатай хандаба. Тиихэдээ «Буряад үнэнэй» сэтгүүлшэн ябаһан Намдаг Цыбеновтэ Россиин баатар гэһэн үндэр нэрэ зэргэ олгуулая гэжэ дурадхаба. Хоёр медальтай, Ленинэй ордентой нютагаа бусаһан ахатаниие хүндэлэн, наһан болоһоншье һаань, үнэн юумэ үнэнөөрнь шиидхэе гээд уряалба.
- Таниие дэмжэхээр бэлэмби. Сугтаа хүдэлэе, - гээд уласай толгойлогшо шууд тэмдэглээ.
Буряад Уласай Засагай газарай мэдээсэлэй албанай гэрэл зураг
