851
Улаан-Үдэдэ бүтээгдэһэн протез хари гүрэнэйхиһөө дээрэ
Улаан-Үдэ хотын «Салют Орто» түб Ородой Холбоото Улас дотор эгээл түрүүшын 3D түхэлэй хэмэл үбдэг бүтээбэ. Иимэ протезүүд мүнөө үедэ гансал Германи, Америкэ, Исланди мэтын хари гүрэндэ хэгдэдэг. Мэргэжэлтэдэй тэмдэглэһээр, «Салют Орто» түбэй бүтээл хари гүрэнэй протезүүдһээ һураггүй дээрэ - хүнгэн, үнэгүйшье байха.
- 3D түхэлэй, олон үүргэтэй иимэ протезтэй хүн өөрынгөө хүлөөр ябаһандал гэшхэлхэ. Авто-унаадашье һуухадаа, ябагааршье ябахадаа ядалсахагүй, - гэжэ «Салют Орто» компаниин юрэнхы захирал Иван Худяков хэлэбэ.
Энээнһээ урид бүтээгдэһэн протезүүдээр түргэн ябахаар бэшэ. Харин мүнөө гидравлика хэрэглэн бүтээгдэһэн хэмэл үбдэг удааханшье, яаралтайшье алхалхада таарамжатай.
- Һүүлэй жэл хахад соо хүнүүд протез яажа хэрэглэнэб гэжэ шэнжэлээбди. Гадна яажа, ямар материалаар тэрэниие бүтээхэб гэжэ баһал асуулта үнгэргөөбди, - гэжэ мэргэжэлтэд тэмдэглэнэ.
Протезтэй хүнүүдэй ябадал шэнжэлхэ гэжэ «Салют Орто» түбтэ октябрь һарада тусхай ажал ябуулагдаа. Эндэ эрэмдэг бэетэй хүнүүд протез хэрэглэжэ һураһан байна. Иимэ ажалай ябуулагдаһанай удаа эрэмдэг хүнүүд дохолхоёошье болёод, бусадһаа илгаруулхаар бэшээр алхалдаг болошоно.
- Хэдэн ондоо аргаар үбдэг сэхэлхэ, нугылгаха модуль зохёогообди. Тиигэжэ тэрэнээ үргэнөөр үйлэдбэрилжэ эхилхээр бэлэмди. Энэ талаар бидэ Буряад Уласай Засагай газартай хамта Роскосмостой хэлсээ баталаабди, - гэжэ Иван Худяков тэмдэглэбэ.
Мүнөө «Салют Орто» түбтэ хэмэл үбдэгэй туршалга хэгдэнэ. Тэрэниие үргэнөөр үйлэдбэрилхын тулада хахад жэл тухай үнгэрхэ. Удаань эрэмдэг бэетэй хүнүүд шэнэ протез хэрэглэхэ аргатай болохо. Жэшээлхэдэ, Наталья Капустина хүндэ үбшэндэ нэрбэгдэжэ, хүлөө отолуулха баатай болоһон байна. Тиигэжэ түлбэригүйгөөр протез абаха арга бии гэжэ тэрэ мэдээд, энэ түб руу хандаа.
- Ноябриин хуушаар шэнэ протезтэй болохоб, һурахал юм бэзэб даа. «Салют Орто» түбтэ үбдэгэй модульдо дадажа байнаб. Шадаха байхаб гэжэ һананаб, - гэжэ Наталья тэмдэглэнэ.
«Салют Орто» түбэй захирал Екатерина Гаськовагай хэлэһээр, протезүүд хүн бүхэндэ заатагүй тааруулан бүтээгдэдэг. Шухалань гэхэдэ, тэрэнь хүнгэн байха, гадна зохидоор харагдаха ёһотой. Тиихэдэ эхэнэртэ гү, али эрэ хүндэ протез бүтээхэнь баһал илгаатай.
Баримта
«Салют Орто» түб 2018 ондо байгуулагдаһан. Тэрэ Буряад Уласта протез үйлэдбэрилдэг ори ганса хубиин түб болоно. Жэлэй туршада энэ компани 20 сая түхэригэй протезүүдые бүтээгээ. Мүнөө Эрхүү хотодо, Мордовидо тус түбэй таһагуудые, тиихэдэ Москва хотодо түлөөлэлгын газар нээнхэй. «Салют Орто» «Сколково» түбэй түлөөлэгшэ болоно гээд тэмдэглэлтэй.
Буряад Уласай Засагай газарай мэдээсэлэй албанай гэрэл зураг
