623
Ородой Холбоото Уласайалишье нютаг можоһоо Алас Дурна зүг руу хүрэхэ авиарейснүүдтэ 2020 ондо 24 маршрут нэмэгдэхэ. Энээн тухай Ородой Холбоото Уласай юрэнхы сайд Дмитрий Медведев тогтоол абаһан байна.
Тогтоолой ёһоор, Буряад Уласһаа Москва, Санкт-Петербург, Владивосток, Симферополь, Екатеринбург, Новосибирск, Сочи ба Жуковский руу хүнгэлтэтэй бүлэг зондо тэдхэмжэтэй маршрудууд байгуулагдаха.
Ородой Холбоото Уласай юрэнхы сайд Дмитрий Медведевэй хэлэһээр, мүнөө Алас Дурна зүг руу тэдхэмжэдэ хүртэһэн маршрудуудай программын хэмжээндэ 152 маршрут бии, 2020 онһоо тэдэ 176 болохо.
- Дунда зэргээр авиазөөлгэдэ 30% тэдхэмжэ үгтэхэ, тэрэнь хүнгэлтэтэй бүлэг зондо хүртөөмжэтэй хэмжээндэ биледэй сэн баряад байха болоно, - гэжэ Дмитрий Медведев хэлээд, авиабиледэй сэн эконом-класста нэгэ һуури аралжаанай тарифай сэнһээ 50% доогуур байха гэжэ тэмдэглээ.
Улаан-Үдэ руу тэдхэлгэтэй маршрудуудай тоолборидо долоон хотонууд ба Жуковский аэропорт (Москва можо) ороно. Тиихэдэ
2020 ондо Улаан-Үдэһөө Москва хүрэтэр биледэй сэн - 6200 түхэриг, Санкт-Петербург – 8200 түхэриг, Симферополь – 8875 түхэриг, Владивосток – 3000 түхэриг, Екатеринбург – 5500 түхэриг, Новосибирск – 2500 түхэриг, Сочи - 8850 түхэриг ба аэропорт Жуковский – 7550 түхэриг байха.
Росавиацитай хэлсээ баталһанай удаа, тэдхэмжээр Улаан-Үдэһөө ниидэхэ болоһон авиакомпанинууд эли болохо гэжэ Буряад Уласай Тээбэриин яаманда мэдээсэнэ.
- Ородой Холбоото Уласай Засагай газарай дэмжэһэнэй, Алас Дурнын тойрогой бүридэлдэ ороһоной ашаар уласаймнай ажаһуугшад гүрэн дотороо аяншалха аргатай болоно. Тиихэдэ олон хүүгэдтэй бүлэнүүд хүнгэлтэтэй билет абаха юм, - гэжэ Алексей Цыденов хэлээ.
Баримта
Программа январиин 1-һээ декабриин 31 болотор бэелүүлэгдэхэ. Тусхай тарифаар билет абаха эрхэтэй гэбэл, 23 наһа хүрэтэр Ородой Холбоото Уласай эрхэтэд, 55-һаа дээшэ наһанай эхэнэрнүүд ба 60-һаа дээшэ наһанай эрэшүүл, ямаршье наһанай I-дэхи группын эрэмдэг бэетэй зон, тэдэниие абажа ябаһан хүн, эрэмдэг бэетэй үхибүүд болон тэдэниие абажа ябаһан хүн, хүүгэд наһанһаа II ба III группын эрэмдэгтэйшүүл, олон хүүгэдтэй бүлэнүүд болоно.
