666
Буряад уласай ниислэл хотын 8-дахи болон 9-дэхи һургуулинуудта хэмэл хушалтатай футбол наадаха талмайтай ба резинэ хушалтатай гүйхэ зүргэтэй шэнэ стадионууд нээгдэбэ. Тамирай талмай тойруулан, гэрэлтүүлгэ хэгдэнхэй.
8-дахи һургуулиин захирал Оксана Грязновагай хэлэһэээр, энэ һургуулиин тамирай талмай тоног хэрэгсэлнүүдэй талаар, тодорхойлбол, һаадтай урилдаха зүргэтэй, хото соо ори ганса. Тиихэдэ ахалагша ангинуудай һурагшадые Ородой Холбоото Уласай сэрэгэй албанда бэлдэхэдэ туһа болохо.
- Энээнһээ урид шэнэ стадионуудай баригдаха ехэ хомор байгаа. Мүнөө Алас Дурнын тойрогой тэдхэмжын хэмжээндэ, Буряад Уласай Засагай газарай болон Улаан-Үдэ хотын захиргаанай оролдолгоор үхибүүдэй ажабайадл һайжаруулха талаар ажал ябуулагдана, - гэжэ Улаан-Үдэ хотын болбосоролой талаар хорооной түрүүлэгшэ Татьяна Митрофанова хэлэбэ.
Стадионуудай ехэ заһабарилга Алас Дурнын тойрогой тэдхэмжын хэмжээндэ хэгдээ. 9-дэхи һургуулиин стадион заһабарилгада 9 саяһаа дээшэ мүнгэн һомологдоо. 8-дахи һургуулида – 10 саяһаа дээшэ гээд тэмдэглэлтэй.
Жэлэй дүүрэтэр Буряад Уласай эдэй засагай хүгжэлтын түбүүдэй түсэбэй хэмжээндэ Улаан-Үдэдэ «Золотой Дракон » гэһэн тамирай 18-дахи һургуули заһабарилагдана. Хэжэнгэ аймагай Хэжэнгэ тосхондо тамирай комплексын барилга хэгдэнэ. Мүн тиихэдэ спортын табан талмай: Захаамин аймагай Дүтэлүүр ба Үлэгшэн һууринуудта, Хяагта аймагай Бага Хүдэр һууринда, Сэлэнгэ аймагай Ташар һууринда ба Хойто-Байгалай Уоян тосхондо нээгдэхэ. Алас Дурнын тэдхэмжын хэмжээндэ Загарай аймагай Онохой тосхондо Гиирь үргэлгын спортын ордон худалдан абтаа.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Удаань 19 хэмжээ ябуулганууд нэмэгдээ.Һомололгын мүнгэн бүхыдөө 6,8 млрд түхэригтэ хүрэнэ.
Улаан-Үдэ хотын мэдэсэлэй бодолгын талаар хорооной гэрэл зурагууд
