839
Буряад Уласай Толгойлогшо мүнөөдэр, ноябриин 25-да, үнгэргэгдэһэн түсэблэлгын суглаанда уласай болбосоролой болон эрдэм ухаанай, ниигэмэй хамгаалгын яамануудта ниигэмэй эмхинүүд хэр түлэгдэнэб гэжэ шалгаха гэжэ даалгаһан байна.
- Бүхы һургуули, хүүгэдэй сэсэрлигүүд, ниигэмэй хамгаалгын яаманай мэдэлэй эмхинүүдтэ хэр дулаан бэ гэжэ долоон хоногой туршада шалгаад, удаадахи суглаанда энээн тухай тоосохот, - гэжэ Буряад Уласай Толгойлогшо Алексей Цыденов хэлэбэ.
Буряад уласта дулаасуулгын хаһа гурим соогоо үнгэрнэ гэжэ барилгын болон гэр байрын ажахы шэнэдхэлгын сайд Николай Рузавин тэмдэглээ.
Дулаасуулгын хаһада бэлэдхэл ноябриин 1-һээ 8 болотор хорин аймагта, хотын хоёр тойрог болон 5 һууринда үнгэргэгдөө. Мухар-Шэбэр, Бабанта, Зэдэ, Сэлэнгэ, Хори, Захаамин, Бэшүүр, Ярууна, Ивалга, Кабанск, Хэжэнгэ, Хурамхаан, Байгал шадарай болон Тарбагатай аймагуудта, Улаан-Үдэ, Северобайкальск, Хяагта, Гусиноозёрск хотонууд, Таксимо болон Северомуйск һууринууд дулаасуулгын хаһада бэлэн гэһэн үнэмшэлгэтэй болоо.
Тиихэдэ Баргажан, Загарай, Хяагта, Муя, Хойто-Байгалай болон Түнхэн аймагууд болон Закаменск хото ноябриин 29 болотор гараһан асуудалнуудые шиидхэхэ талаар ажал ябуулха.
Ноябриин 22-ой мэдээгээр, Баргажан, Бэшүүр, Зэдэ, Ярууна, Ивалга, Хурамхаан, Хори, Захаамин аймагууд болон Улаан-Үдэ, Закаменск хотонуудта нормативай ёһоор хүрэхэ түлишэтэй гээд тэмдэглэлтэй. Юһэн аймагта 26 үдэрһөө дээшэхэнэ түлишэтэй, энэнь нормативта тааруу бэшэ.
Загарай аймагай Ильинка, Челутай, Онохой нютагуудта, Кабанск аймагай Бабушкин хотодо 9-11 үдэрэй туршада хүрэхэ түлишэтэй. Энэ байдал онсо хинагдана. Нютагай засагай байгууламжануудай хүтэлбэрилэгшэдтэ дулаасуулгын хаһа гурим соонь үнгэргэхэ талаар түлишөөр хангаха гэжэ даалгагдаа.
