1522
Баатар Цыбенжапов
Үбэр Байгалай хизаарай Агын аймагай Согто-Хангил хамтаралай ахалагша хонишон Баатар Цыбенжапов «Эсэгэ оронойнгоо үмэнэ габьяатай байһанай түлөө» II шатын орденой медаляар шагнагдаһан байха юм. Тэрэ мүнөө үедэ Үбэр Байгалай хизаарай эгээл бэрхэ хонишодой нэгэн гэжэ тоологдоно.
Агын уужам талада түрэжэ, хүлөө шоройдожо бордойһон «Согто-Хангил» нютагайнгаа агро-хамтаралай ахалагша хонишоноор Баатар Бальжинимаевич ажаллажа, эхэ эсэгынгээ хэрэгые саашань үргэлжэлүүлжэ байна.
Баатар Цыбенжапов 1965 ондо худанса шарайд угай Бальжинима Цыбенжапов Мыдыгма Гуруева хоёрой эбтэй гэр бүлэдэ гурбадахи үринь боложо түрэһэн. 1982 ондо нютагайнгаа дунда һургуули түгэсхөөд, Агын авто-һургуулиин курснуудта һурахаяа ороод байтарнь, тэрэниие сэрэгэй албанда татаһан. Хоёр жэлэй туршада Совет Армида алба гараад, түрэл нютагаа бусажа, ажалайнгаа намтар хонишоной туһалагшаар эхилһэн. Тиигэжэ эхэ эсэгынгээ хэжэ ябаһан хүдэлмэри хаража, тэдэнэртээ туһалжа ябахадаа, дүршэл шадабарииень халан абаа. Удаань Ага-Хангил тоонтотой Жалма гэжэ нэрэтэй һайхан басаганда дурлажа, айл бүлэ болоһон.
2000 ондо Баатар ба Жалма Цыбенжаповтанай гэр бүлэдэ хонин һүрэг даажа абахыень дурадхал ороһон. Тэрэ гэһээр өөрынгөө хуби заяае мал ажахытай холбоһон байна.
Хонишоной ажалда нилээд ехэхэн хүсэ шадал, оролдолго ба тэсэбэри хэрэгтэй гэжэ хүн бүхэндэ мэдээжэ. Баатар Бальжинимаевич Жалма Цырендоржиевна хоёр ажалдаа харюусалга ехэтэй, нэтэрүү байһанайнгаа ашаар үндэр дүн туйлана. Имагтал тэдэнэй харууһалжа байһан һүрэг дээрэ Үбэр Байгалай нарин нооһото үүлтэр һайжаруулгын талаар эрдэмэй туршалганууд ябуулагдана.
Арбаад жэлэй туршада Баатар Бальжинимаевич Сибириин болон Алас Дурна зүгэй регион хоорондын үүлтэртэ хони ямаадай үзэсхэлэн дээрэ эхэ хонидоо ба түлгэнүүдээ абаашажа харуулна. Тиигэжэ нэгэтэ бэшэ алтан, мүнгэн медальнуудта ба дипломуудта хүртэһэн байха юм.
Цыбенжаповтанай бууса, хонидойнь хашаа, хорёо хододоо жэншэдгүй ажаллаатай байдаг хадаа малшадай буусын ариг сэбэрые шалгаха талаар аймагай ба тойрогой харалга-мүрысөөнүүдтэ оло дахин шалгарһан, шангуудта хүртэһэн. Гадна малай үбэлжэлгэдэ бэлэдхэхэ талаар Агын тойрогой хонишодой дунда болоһон ажалай тэмсээндэ түрүү һуури эзэлһэн байдаг.
Баатар Бальжинимаевич залуу хонишодой һургагша болонхой. Тэрэнэй бууса дээрэнь жэл бүри хэмэл аргаар үрэжүүлгын талаар семинарнууд үнгэргэгдэдэг. Тиихэ үедэнь Могойтын хүдөө ажахын, үйлэдбэриин техникумэй оюутад ерэжэ, һуралсал гарадаг заншалтай.
Үүлтэртэ ажахын хүгжэлтэдэ өөрын ехэ хубита оруулһанайнгаа түлөө «Агын Буряадай автономито тойрогой хүдөө ажахын габьяата хүдэлмэрилэгшэ» гэһэн хүндэтэ нэрэ зэргэ Баатар Цыбенжаповта олгогдоһон байха юм. Тиин агропромышленна комплексдо олон жэл соо үнэн сэхээр ажаллаһанайнгаа ба үүлтэртэ хонидые хүгжөөлгэдэ хубитаяа оруулһанайнгаа түлөө Ородой Холбоото Уласай Хүдөөажахын яаманай Хүндэлэлэй грамотаар шагнагдаһан байха.
Хүн бүхэн өөрөө өөрынгөө харгы шэлэдэг. Баатар Цыбенжапов өөртөө наһанай иимэ харгы шэлэһэн байжа, тэрэ харгыгаар найдамтайгаар алхалһаар.
Баатар Цыбенжаповай гэр бүлын жасаһаа гэрэл зураг абтаба
Шойжит АРСАЛАНОВА
Ага тосхон
