​​Бүхэдэлхэйн санашадтай урилдаха

Бүхэдэлхэйн санашад үбэлэй ээлжээтэ хаһаяа ерэхэ амаралтын үдэрнүүдтэ эхилхэ. Ноябриин 29-һөө декабриин 1 хүрэтэр Финляндиин Рука (Куосамо) хотодо дэлхэйн Кубогта хүртэхын түлөө түрүүшын шата үнгэргэгдэхэ. Тус мүрысөөндэ Буряадай тамиршан Алиса Жамбалова хабаадахань гэһэн баяртай мэдээсэл ерэбэ.

2019 ондо Алиса Жамбалова ялас гэмэ амжалта туйлаа бэлэй гээд һануулая. Бүхэдэлхэйн оюутадай универсиадада тэрэ дүрбэ дахин чемпионой нэрэ зэргэдэ хүртөө. Удаань анха түрүүшынхиеэ Ородой чемпион боложо тодороо.

Үбэлэйнгөө халаанда санашад эртээнһээ бэлдэжэ эхилдэг. Май һараһаа хойшо Алиса Жамбалова бэлэдхэлэй табан шата дабаа. Харин һүүлэй хоёр долоон хоногто Ородой суглуулагдамал командын бүридэлдэ орохын түлөө шэлэн абалгын шанга гэгшын шалгалтануудта оролсоо гээд хэлэхэ хэрэгтэй.

Түрүүшын мүрысөөндэ Алиса Жамбалова классическа түхэлөөр спринт урилдаанда түрүү һуури эзэлээ. Мүн өөрын дураар ябалгын 10 километр зайда 7-дохи ерээ. Эдэ хоёр урилдаанда хэдэн гүрэнэй түлөөлэгшэд хабаадаа.

Үнгэрһэн долоон хоногой эсэстэ болоһон урилдаануудта ганса Ород гүрэнэй түрүү санашад бэе бэетэеэ мүрысөө. Өөрын дураар ябалгын 10 километр зайда Алиса Жамбалова нэгэдэхи гүйжэ ерээ. Хоёрдохи һуурида гараһан тамиршаниие тэрэ 20 секундаар хүсөө. Удаадахи классическа түхэлөөр урилдаанда Алиса дүрбэдэхи һуурида гараа.

Энэ мүрысөөнүүдэй удаа Ородой суглуулагдамал командын һоригшод дэлхэйн Кубогта ошохо тамиршадые нэрлээ. Түрүүшын хоёр шатада найман тамиршад хабаадаха юм. Тэрэ тоодо Алиса Жамбалова оролсоо.

Буряадһаа гарбалтай Диана Головань анха түрүүшынхиеэ дэлхэйн Кубогта хүртэхын түлөө мүрысөөнүүдтэ хабаадаха эрхэдэ хүртөө. Диана хадаа Улаан-Үдэдэ түрэһэн намтартай. Багаһаа хойшо спортын 4-дэхи һургуулида санаар бэеэ һорижо эхилээ. Һургуулияа дүүргэмсээрээ Хакас Улас һуралсалаа үргэлжэлүүлхэеэ ошоо һэн.