​​Ашагтай хөөрэлдөөн

Хүндэтэ уншагшад, социальна холбоон соо нюдэндэм торосолдоһон зарим адаглалтануудаа заншалта ёһоор та олондоо дуулгаһуу.

Боргой гү, али Борьёо?

Үргэлжэ буряадаараа харилсадаг Ольга Намдаковагай жэшээ халан абагшад олон боложо байна гээд обёордог болооб. Илангаяа урид балай “бултайдаггүй” аад, һүүлэй сагта үргэлжэ буряадаараа олонтой хөөрэлдөө дэлгэжэ байгшад дайралдана. Тэдэнэй тоодо баһал Буряадай гүрэнэй радиогой сэтгүүлшэн Дарья Цыдыповае оруулхаар. Һаяхана тэрэ өөртөө шэнэ нээлтэ хээд, бултантай иигэжэ хубаалдаба:

«Буряадаараа Боргойн бэшэ - Борьёогой гээд хэлэдэг юм. Аха захатан намда ехэ зохидхоноор ойлгуулжа үгөө. Өөрөө Зэдын бэшэ аад, мэдэхэгүй байгааб».

Жамбал Хумаев:

- Мүнөө олон зон мэдэхэ болохо.

Даша Цыдыпова:

- Ши бидэ хоёр сохом мэдэхэ болообди.

Жамбал Хумаев:

- Хари. Нүгөө талаар, буряад хэлэнэй ёhоор Боргойн бэшэ.

Даша Цыдыпова:

- Зүбөөрөө, буряадаараа - Борьёогой болоно гээ. Боргойн гэхэдээ, ородоор хэлэнэш гэжэ ойлгуулаа.

Жамбал Хумаев:

- Тэрэниие ойлгоноб, би грамматика тухай хэлэнэб. Нютагаархидай хэлээр болоо hаа, нютагынь Борьёо болоно.

Даша Цыдыпова:

- Зэдын нүхэдhөө үшөө лаблахада болохол даа.

Эдэ хоёрой хөөрэлдөө уншаад, hэжэг түрөөд, хэлэ бэшэгэй эрдэмэй доктор Бабасан Доржиевич Цыреновтэ утаһаар залгажа хандабаб. Тиигэһэмни иигэжэ дуулгаба:

- 2014 оной декабриин 23-да баталагдаһан Буряад Уласай Хуулита шиидхэбэринүүдэй суглуулбариин 164-дэхи нюурта Борьёо һуурин гээд бэшээтэй. Тиимэһээ “Борьёо” гээд бэшэхэ ба хэлэхэ хэрэгтэй.

Буряад үзэгүүдээ зүбөөр бэшэе!

Буряад “ү, өө, ” үзэгүүд тушаа хөөрэлдөөнүүд замханагүй. Эдэ үзэгүүд ород хэлэндэ үгы тула, ородонь ород “у” болон хоёр “о” табигдана. Вайбер, Ватсап болон бусад бүлэмүүдтэ, социальна холбоон соо иимэ жэшээнүүд дэлгэрэнги. Һаяхана Буряад Уласай Болбосоролой сайд Баир Жалсанов «Бэлигэй туяа» тушаа пост тунхаглахадаа, үнөөхил үзэгүүд тушаа хэлүүлбэ.

Ноябриин 21-дэ болоһон хэмжээнэй иигэжэ уряалаа:

“Эрхим хундэтэ нухэд, муноодэр Буряадай ундэhэтэнэй нэгэдэхи лицей- интернадай дэргэдэ эрдэмэй «Бэлигэй туяа» гэhэн хуралдаан ажалаа эхилбэ. Буряад уласаймнай аймаг нютагуудhаа 100 гаран эдир шэнжэлэгшэд сугларжа, элидхэлнуудээ хэхэнь, урэ дунгуудээ согсолхонь. Хуралдаанда хабаадагшадтаа ундэр амжалтануудые хусэеэ!”

Энэ постын доро харааха ба үреэхэ зон олдобошье, хоёр коммент ехэ ашагтай:

Долгор Дашиева:

- Утаһан соотнай Play Market приложени байха. Тэрэ приложени соо буряад клавиатура бэдэрээд, утаһан соогоо оруулбал, буряад үзэгүүд бии болохо.

Баирма Раднаева:

- Бальжинима Дамбаевта хандагты. Би буряад үзэгүүдтэй болошоод, һанаа амар бэшэнэб.