1412
Сэрэгэй уласхоорондын наадануудай хэмжээндэ үнгэргэгдэһэн 36-дахи армиин сэрэгшэд танкова биатлондо түрүү һуури эзэлбэ. Энэ нааданда хабаадаһан Бато Цыдыпов, Иван Осеев хоёрто уласай толгойлогшын зүгһөө хүлэг моридые абаха үнэмшэлгэ барюулагдаа.
Буряад Уласай Засагай газарай аюулгүй байдалай талаар түрүүлэгшын орлогшо Петр Мордовской бэлэгүүдые барюулаа.
- Буряад Уласай Толгойлогшо Алексей Цыденовэй зүгһөө манай сэрэгшэдые амаршалжа, буряад үүлтэрэй мори абаха үнэмшэлгэнүүдые барюулнабди. Буряадай хүбүүд дэлхэйн чемпионүүд гэжэ мүнөө дэлхэйдэ, гүрэн доторнай мэдээжэ болоо, - гэжэ сайд тэмдэглээ.
Үндэр амжалта туйлаһан сэрэгшэдые Зүүн зүгэй сэрэгэй тойрогой командующи, генерал-лейтенант Геннадий Жидко, 36-дахи армиин хүтэлэгшэ, генерал-лейтенант Михаил Носулев, Арадай Хуралай Түрүүлэгшэ Владимир Павлов, Улаан-Үдэ хотын мэрэй уялга саг зуура дүүргэгшэ Олег Якимовский, эхэнэрнүүдэй зүблэлэй түлөөлэгшэ, отставкада капитан Наталья Назарова гэгшэд амаршалаа.
Буряад Уласай Засагай газарай мэдээсэлэй албанай гэрэл зураг
