​​Нооһон хаягдахагүй

Ород гүрэнэй Юрэнхылэгшэ Владимир Путин нөөсэ жасаһаа Буддын шажанай заншалта Сангхада 30 сая түхэриг үгөө гэжэ булта мэдэнэбди. Энэ мүнгэн хониной нооһо болбосоруулха тоног түхеэрэлгэ худалдан абаха хэрэгтэ шэглүүлэгдэхэ юм.

Сангхын бэелүүлдэг “Зоной хонин һүрэг” гэһэн ниигэмэй түсэл баһал Владимир Владимировичай горитой дэмжэлгэдэ хүртэһэн юм гэжэ һануулая. Харин мүнөө, бүхы Буряадай тала дайда бүрхөөхэ ёһотой хонин һүрэгүүдэй олошоржо байхада, нооһыень зөөри болгохо хэрэгтэй.

Дамба Аюшеевэй онсолһоор, мүнөө хониной нооһон болон арһан хэрэгсээгдэнгүй хаягдана. Тоног түхеэрэлгэтэй болобол, нооһоорнь ланолин, хүүгэдэй хубсаһа оёхо утаһа, дулаан дотор хубсаһа үйлэдбэрилхэ арга байна. Арһыень элдэжэ, дулаан хубсаһа хунар оёхоор. Иимэ үйлэдбэринүүд хүдөө нютагуудта байгуулагдажа, хүн зон ажалтай болохо жэшээтэй.

Энэ түсэлэй зондо тон туһатайень, ашаг үрэтэйень арсаха хүн олдохогүй: буряад хонин һүрэг, заншалта хонин ажал һэргээгдэжэ байна, мүнөө нооһо болон арһыень болбосоруулха саг ерээ. Энэ хэрэг яаха аргагүй урагшатай байха – жэлдээ 6 дахин үнгэргэгдэдэг “Эхэ хэлэн – манай баялиг” урилдаанда хабаададаг үхибүүдшье арһа элдэжэ, тэрээгээр хубсаһа хунар оёжо һуражал ябана гээшэ.

Анна Огороднигой гэрэл зураг