Лариса Сансанова
Буряад Уласай наркологическа диспансертэ һэргылэмжын таһаг бии. Тус таһагай бии болоһоор оройдоол 11 жэл болоод байна. 2002 онһоо эхилжэ, тэрэниие даагшаар Л.Б. Сансанова ажаллана.
- Лариса Баировна, һэргылэмжын таһагта бүхыдөө хэды мэргэжэлтэ психологууд ажалланаб?
- Энэ диспансертэмнай түрүүшээр юрын эмшэд һэргылэмжын хүдэлмэри ябуулдаг байһан, удаань 2008 оной январиин 9-дэ таһагаймнай шэнээр нээгдэхэдэнь, 4 психолог хүдэлжэ эхилээ, мүнөө 6 болонхойбди. Ээлжээгээр элдэб тээгүүр ябажа, гэгээрүүлгын, ойлгууламжын хүдэлмэри хэнэбди. Дунда болон дээдэ һургуулинуудаар ябажа, архиин болон нарко- бодосуудай хорон тухай лекцинүүдые уншанабди. Гадна олондо мэдээсэл тараадаг хэрэгсэлнүүдэй хүсөөр ба өөһэдынгөө бүтээһэн буклет, плакат г.м. хэрэглэн, арад зоной дунда һэргылэмжын ажал ябуулнабди. Тиихэдэ архи, тамхинда орошоһон хүнүүдтэ амидаралаа хайшан гэжэ элүүр шэнжэ түлэбтэй болгохыень һурганабди. Мүн иимэ бэрхэшээлтэй зониие эртүүр элирүүлхэ гэжэ оролдодогбди.
- Жэшээнь, һаянай хаагуур ябажа, ямар хүдэлмэри ябуулаабта?
- Ноябрь һарада Улаан-Үдэ хотынгоо Мариинска интернат-һургуулида элүүр энхэ ябахын түлөө яармаг үнгэргөөбди. “Тамхинай утаагүй дэлхэй” гэжэ уран зурагай мүрысөө үнгэргөөбди. Тэрээнһээ гадна энэ жэлэй хугасаа соо прибор бүтээлгын заводто, налогово албанда ба худалдаа наймаанай түбүүдээр олоной хабаадалгатай акцинуудые үнгэргэнэбди. Зундаа “Наркотигто эсэргүүсэнэбди” гэһэн уряатайгаар вело-урилдаануудые үнгэргэхэдэмнай, хотын һургуулинуудай ба эмхи зургаануудай команданууд ерэжэ хабаадалсаа. “Юбилейный” гэһэн сэсэрлигтэ “Хүнгэнөөр амила” гэһэн олоной хабаадалгатай хэмжээ үнгэргөөбди. Элүүр энхэ ябахын түлөө олон яармагууд болоо. Уласайнгаа аймагуудаар ябанабди. Хоёр үдэрэй туршада “Архи уунгүй, элүүр ябаябди” гэһэн хэмжээ ябуулга үнгэргэхэдөө, архи ууһанай хойшолонгоор хэды зон наһа баранаб, гэмтэ хэрэгэй дэлгэрэлгэтэй хайшан гээд тэмсэхэб, наркотигуудай хуули буса эрьесэдэ яажа эсэргүүсэхэб гэһэн асуудалнуудаар хэмжээ ябуулганууд хэгдээ, тиин үхибүүдтэ зорюулан, брейн-ринг, футбол ба волейболоор мүрысөөнүүдые үнгэргөөбди.
- Харин мүнөө үедэ ямар юумэ үнгэргэхэ гэжэ сүлөө забдагүй байнабта?
- Мүнөө бидэ тусхай мэргэжэлэй дунда һургуулинуудай оюутадай дунда асуулта үнгэргэхэ гэжэ байнабди.
Лариса Сансановагай дурадхаһан гэрэл зураг