​​Залуушуулай тэмсээн

Эдиршүүлэй дунда Буряад Уласай даам наадалгаар чемпионадта 7 аймагай болон Улаан-Үдын 85 тамиршад суглараа. Ахамад шүүгшэ Владимир Талхановай мэдүүлһээр, һүүлэй жэлнүүдтэй зэргэсүүлбэл, хабаадагшадай тоо нэмэгдээ.

- 2019 оной хүдөөгэй спортын наадануудай программада даам наадалга дахинаа оруулагдаа. Тиимэһээ хүдөөдэ манай нааданда анхарал шэнээр хандуулжа эхилһэниинь һайшаалтай, - гэжэ Владимир Талханов һанамжална.

1-4-дэхи классуудай үхибүүдэй дунда Загарай аймагай Ярослав Сковитин болон Александра Халудорова гэгшэд түрүүлжэ гараа.

Кабанск аймагай Илья Водовозов болон Бэшүүр аймагай Адиса Очирова гэгшэд 5-8-дахи классуудай үхибүүдэй дунда нэгэдэхи һууринуудые эзэлээ.

Ахамад классуудай үхибүүдэй дунда Улаан-Үдэ хотын Бато Будаев болон Загарай аймагай Аяна Гомбоева гэгшэд чемпионууд боложо тодороо.

Энэ мүрысөөндэ шалгарһан тамиршад Алас Дурнын тойрогой чемпионадта ошохо эрхэдэ хүртөө.