​​Буряад Уласай Хурамхаан аймагта ойн ажахы “Үбэлдөө шубуудые эдеэлүүлэ” гэһэн хэмжээ ябуулга эмхидхэнэ

Хурамхаанай лесхозой хүдэлмэрилэгшэд “Үбэлдөө шубуудые эдеэлүүлэ” гэһэн һонирхолтой хэмжээ ябуулга эмхидхэнэ. Һаяын үдэрнүүдтэ тус хэмжээндэ Сахули һууринай үхибүүд хабаадаа.

Үбэлдөө ямар шубууд эдеэ хоолгүй үлэшэнэб, тэдэ хүнүүдэй бэлдэһэн багахан гэрнүүдтэ хэзээ хүрэнэб гэхэ мэтын һонирхолтой зугаа ойн хүдэлмэрилэгшэд дэлгээ.

Хэмжээ ябуулгын үедэ үхибүүд өөрын гараар багахан гэрнүүдые дархалжа, газаахи модон дээгүүр үлгөө. Тэдэ гэрнүүдтэ шубууд ганса эдеэ хоол олоно бэшэ, мүн шуурга саһанһаа хоргодохо аргатай.

Үхибүүдэй тэмдэглэһээр, кормушкануудта тэдэ ходо эдеэ хэжэ байха.