906
Буряад Уласай Толгойлогшо декабриин 8-да албанай хэрэгээр Хори аймагаар ябажа, аймагай хүдөө ажахын һалбаритай танилсажа, болбосоролой, элүүрые хамгаалгын, спортын эмхинүүдтэ хүрэбэ.
«Бүүбэй» үүлтэрэй хони болон эбэртэ бодо мал үсхэбэрилдэг Валерий Буянтуевай ажахыда уласай хүтэлбэрилэгшэ хүрэһэн байна. Мүнөө энэ ажахыда мянга тухай хонид болонхой. Тус ажахы халуун эдеэ хоолой «Сэлмэг Булаг» гэһэн газар баринхай гээд тэмдэглэлтэй. Удаань Алексей Цыденов Хори тосхондо «Основа» гэһэн бүлгэмэй мяха үүсэлэлгын болон мяханһаа эдеэ хоол буйлуулдаг аймаг хоорондын цехэй ажалтай танилсаа.
- «Основа» бүлгэмэй мяха үүсэлэлгын цехтэ хүрөөбди. Богони болзорто үйлэдбэри байгуулжа, мүнөө ажаһуугшадһаа үхэр мал худалдажа абана. Саашадаа мал тэжээхэ пункт нээхэ түсэбтэй. Бидэ туһа хүргэхэбди, - гэжэ Алексей Цыденов хэлэбэ.
Мяха үүсэлэлгын модульна цехэй ажалаа эхилхэдэ, аймагай фермернүүд эндэ үхэр малаа тушааха аргатай болохо.
- Мүнөө улас дотор хониной мяха хүнүүд ехэ абанагүй. Тиимэһээ хонинойнгоо мяха уласһаа гадуур худалдаха талаар асуудал шиидхэхэ хэрэгтэй. Хари гүрэнүүдтэй энэ асуудалаар хэлсэжэ эхилэнхэйбди, - гэжэ уласай хүтэлбэрилэгшэ тэмдэглэбэ.
Баянгол һууринда Алексей Цыденов соёлой-тамирай комплексдо хүрөө. Тус комплекс байгша оной намар заһабарилгын удаа нээгдэһэн байна. 2018 оной зун уласай хүтэлбэрилэгшэ Хори аймагаар ябахадаа, уласай бюджетһээ соёлой-тамирай комплекс заһабарилгада 2 сая 250 мянган түхэриг һомолхо тухай шиидхэбэри абаа һэн. Тиихэдэ аймаг, эбээн тэдхэгшэд болон ТОСууд энэ хэрэгтэ хабаадуулагдаа. Үшөө тиихэдэ 30 үхибүүдэй һурадаг Баянголой һургуулида ехэ заһабари хэхэ хэрэгтэй. Энэ асуудал хаража үзэхэ тухайгаа Алексей Цыденов хэлээ. Буряадай Толгойлогшын тэмдэглэһээр, гараха жэлдэ һургуулинуудай заһабарилгада мүнгэн һомологдохо. Мүнгэ һомололгын хэмжээндэ түрүүлэн заһабарилха хэрэгтэй һургуулинууд һэльбэн шэнэлэгдэхэ гэжэ уласай хүтэлбэрилэгшэ онсолбо.
Буряад Уласай Толгойлогшо Алексей Цыденов Хориин аймагай түбэй больницада хүрэһэн байна. Энэ эмхидэ лифт, Тээгдын амбулаторидо дулаасуулгын һужаа заһабарилагдаа, түргэн туһаламжын машина абтаа.
- 2018 ондо аймагаар ябаһанай дүнгүүдээр, 1967 онһоо хойшо хүдэлхэеэ болиһон лифт заһабарилагдаа. Мүнөөшье шиидхэхэ асуудалнууд олон: байшанда ехэ заһабари хэхэ хэрэгтэй, дулаасуулгын һужаа, канализаци шэнэлхэ гэхэ мэтэ. Ородой Холбоото Уласай Юрэнхылэгшын элүүрые хамгаалгын һалбари хүгжөөлгын даалгабариин хэмжээндэ хойто жэлһээ бэелүүлэгдэхэ программа бэлдэнэбди. Тиихэдэ аймагай больницада автобус худалдан абаха гэһэн шиидхэбэри абтанхай, - гэжэ Алексей Цыденов хэлэбэ.
Аймаг дотор болоһон шухала үйлэ хэрэгүүдэй нэгэн гэхэдэ наранай элшын зайн галаай станци хүдэлжэ эхилээ. Тэрэнэй нээлгын баяр ёһололдо Алексей Цыденов хабаадалсаа. Наранай элшын зайн галай станци барилгада «Хевел» компани 1,3 миллиард түхэриг һомолһон байна гээд тэмдэглэлтэй.
Буряад Уласай Засагай газарай мэдээсэлэй албанай гэрэл зурагууд
