Хори аймагта 15 МВт хүсэтэй зайн галай станци ашаглалгада тушаагдаба. Табадахи станциин нээлгын баяр ёһололдо Буряад Уласай Толгойлогшо Алексей Цыденов хабаадалсаа. Уласай хүтэлбэрилэгшын тэмдэглэһээр, наранай элшын зайн галай станциин баригдахада, ажалай һууринууд байгуулагдажа, налог татабари түлэгдэнэ. Үшөө тиихэдэ зайн галай түлбэри доошологдоно.
Наранай элшын зайн галай станциин барилгада «Хевел» компани мүнгэ һомолжо, барилга ябуулаа. Барилгын ажал хахад жэлэй туршада хэгдээ. 2019 оной декабрь һараһаа Хориин наранай элшын зайн галай станци ажаллажа эхилһэн байна.
Энэ станцида жэлэй 20 сая кВт*ч элшэ хүсэн үйлэдбэрилэгдэхэ гэжэ түсэблэгдэнэ. Тиигэжэ 30 мянган тонно шулуун нүүрһэн, 6 сая кубометр газ алмагдаха юм.
Буряад уласта Хориин наранай элшын зайн галай станциин «Хевел» компаниин бариһан хоёрдохи станци болобо. 2017 ондо Бэшүүрэй зайн галай станци ашаглалагада тушаагдаа гэжэ һануулнабди.
- 2022 оной дүүрэтэр улас дотор Зэдэ аймагта үшөө хоёр станци баригдаха, - гэжэ «Хевел» компаниин түсэлнүүдые бэелүүлгын талаар захирал Мстислав Арапов тэмдэглэбэ.
Буряад уласай тээбэриин яаманай хэлэһээр, 2019 ондо улас дотор зайн галай гурбан станци Кабанск, Тарбагатай, хяагта аймагуудта ашаглалгада тушаагдаа. 2022 ондо Буряадта наранай элшын зайн галай долоон станци хүдэлхэ юм.
Буряад Уласай Засагай газарай мэдээсэлэй албанай гэрэл зурагууд