Намарай тэн багаар Буряад уласаймнай бүхы аймагуудта таряа хуряалгын хаһа дүүрэбэ һэн. Мэнэ һая Бэшүүрэй аймаг ошоходоо, аймагай гулваа Василий Смолинтой уулзажа, талха таряа хэр зэргэ хадажа, мүнөө үедэ ямар ажал хүдэлмэри ябуулжа байһан тухайнь асуубаб.
Бэшүүрэй аймагай гулваа Василий Смолиной хөөрэһөөр, мүнөө жэлэй таряа хуряалган хэзээ хэзээнэйхиһээ һайнаар үнгэрөө. Орооһото таряан 49 мянган гектар газарта таригдажа, мүнөө тэрэ талмайһаа бүхыдөө 22 мянган тонно орооһон хадагдаа. Энэ ехэ ургаса хуряахын түлөө тарилгын дүрбэн комплекс ажаллаа. Манай аймаг шэнги дүрбэн комплекстой аймагууд улас доторнай үсөөн байһан байха гэжэ аймагай дарга тэмдэглэбэ.
Тиибэшье аймагай түсэбөөр бүтээжэ ябуулха ажал хүдэлмэринүүд барагдашагүй. Мүнөө энэ үедэ Бичурада кинозал нээгдэхэ. Тиихэдэ Шэбэртэдэ һайн үйлэ хэрэг болохо. Нютагайнгаа мэдээжэ уран шүлэгшэ Дондог Улзытуевай дурасхаалда зорюулжа, шэнээр һэргээгдэһэн соёлой байшанда нэрыень мүнхэлэн үгтэхэ.
-Декабриин 30-да аймагай гулваагай тушаалда ороһоорни, түхэреэн жэл болохонь. Жэлэй хугасаада хэжэ байһан ажал хүдэлмэриимни бүхы дүнгүүд согсологдохо, - гэжэ аймагай гулваа Василий Владимирович тобшолбо.
Бато-Цырен Дугаровай дурадхаһан гэрэл зураг