​​Суута тамиршанай шангууд

Буряадай Федерациин гэрэл зураг

Буряадай суута хүбүүдэй нэгэн болохо, һур харбалгаар дэлхэйн чемпион, Олимпиин наадануудта гурбадахи һуури эзэлһэн Владимир Ешеевэй шангуудта хүртэхын түлөө мүрысөөн Шэтэдэ болоһон байна. Декабриин 5-8-ай үдэрнүүдтэ үнгэргэгдэһэн хэмжээ ябуулгада Буряадай тамиршад зургаан медаль абаа.

Аяар 262 хүн сугларжа, мүрысөөндэ хабаадаһан байна. Тэдэнэй тоодо һайн дүнгүүдые Буряадай харбаашад харуулаа.

Эхэнэрнүүдэй дунда тулалдаануудта 14 наһатай Мария Коногорова түрүүлжэ гараа. Тэрэ финалда Буряадай үшөө нэгэ тамиршан Анна Барадиевае шүүжэ шадаа.

Татьяна Бадмажапова, Соёлма Сыренова болон Чимита Лубсанова гэгшэд командна тоосоондо шангай хоёрдохи һуури эзэлээ. Эдэ гурбан Олимпиин халаанай уласай спортын һургуулиин түлөө харбаа.

Блочно түхэлэй номо һуршаар харбагшадай дунда Татьяна Андриевская шангай гурбадахи һуури эзэлээ. Буряадай суглуулагдамал команданууд хоёрдохи болон гурбадахи һууринуудта гараа.

14 наһатай Мария Коногорова мүнөө үедэ Буряадай үндэһэтэнэй 1-дэхи лицей-интернадта 8-дахи класста һурана. Тэрэ һур харбалгаар оройдоол гурбан жэлэй саада тээ һорилго хэжэ эхилээ.

- 2016 ондо Олимпиин наадануудые телевизорээр хаража байтараа, һур харбалгатай дайралдашооб. Харан гэхэдэмни, манай Буряадай Инна Степанова харбажа байгаа. Ехэ һонирхожо хараад, бишье баһа һур харбалгада ошохо аргатайб гэжэ зосоогоо һанан һуугаа һэм. Һургуулиин үеын эхилхэдэ, Александр Романович Хамнагдаевта ошожо, һорилго хэжэ эхилээб, - гэжэ Мария Коногорова хөөрэнэ.

2019 ондо “Стрелы Байкала” гэһэн бүхэроссиин мүрысөөндэ бэлигтэй тамиршан спортын мастер болоо һэн. Үшөө тиихэдэ Түнхэн аймагта үнгэргэгдэһэн уласай хүүгэдэй спортын наадануудта түрүү һуури эзэлээ.