1965
Софья Доржиева
Хориин аймагай Булам тоонто нютагтай галзууд угай Цыбикжап Цынгуев ба Цыбикмит Дондоковагай долоон үхибүүдэй ехэнь Софья 1948 оной үбэлэй эхиндэ түрэhэн байна.
Түрэхэ гарахаhаа hүбэлгэн бэрхэ, сэдьхэлээрээ сэхэ сэбэр басаган байгаа. Долоотойhоо Булам нютагайнгаа эхин hургуулида орожо, номдоо бэрхээр hурадаг дээрээ Ханда Шираповна Ширапова багшадаа ходол hайшаагдадаг hэн. Саашадаа Хориин 1-дэхи hургуулида, удаань Улаан-Үдын багшанарай училищида hуралсалаа үргэлжэлүүлээ. Ажалайнгаа намтар Яруунын аймагай Мужыха нютагта эхин классуудай багшаар эхилhэн.
1970 онhоо 1984 он болотор Хориин аймагай «Үдын hонинууд» гэhэн газетэдэ хүдэлөө. Буряад хэлэеэ hайнаар мэдэхэ тула олон найруулгануудые бэшэдэг байгаа. Эрхим бэрхээр хүдэлһэнэйнгөө түлөө аймагай захиргаанай Хүндэлэлэй грамотануудаар ба баярай бэшэгүүдээр тэмдэглэгдэhэн.
Һүүлдэнь наһанайнгаа нүхэр Сергей Гомбоевич Доржиевтай хамта Баруун-Хасууртын дунда hургуулида олон жэлдэ хүдэлөө. Сергей Гомбоевич hургуулиин хүтэлбэрилэгшөөр, харин Софья Цыбикжаповна эхин классуудай багшаар ажаллаhан юм. Һурагшадынь эгээл hайхан үгэнүүдээр дурдадаг: «Манай багшамнай энхэргэн һайхан зантай, үхибүүдтээ зөөлэхэнөөр хандадаг байгаа». «Софья Цыбикжаповнагай заажа үгэhэн, хөөрэжэ ойлгуулhан юумэ мүнөөшье hананабди. Хэшээлнүүднай ехэл hонирхолтойгоор үнгэрдэг hэн».
Арбан дүрбэн жэлэй хугасаа соо оролдосотой эдэбхитэйгээр, эрхим бэрхээр хүдэлhэнэйнгөө түлөө Софья Цыбикжаповна Буряад Уласай Болбосоролой яаманай Хүндэлэлэй грамотаар шагнагдаhан байна.
- Би бүхы наhан соогоо түрүүшынгээ багшанарые ходол hанажа, тэдэнэрhээ жэшээ абажа ябадагби. Минии багшанар гэхэдэ, Намсалма Батуевна Батуева, Ханда Шираповна Ширапова болонод. Эгээл эдэ намайе түрэл буряад хэлэндээ дуратай болгоhон, - гэжэ Софья Цыбикжаповна ашата багшанараа арюуханаар дурсана.
Софья Цыбикжаповна Доржиева наһанайнгаа амаралтада гарахадаа, Улаан-Үдэ хотодо Хизаар ороноо шэнжэлэлгын музейн эрдэмэй таhагта хүдэлөө. Мүнөө хоёр үхибүүдэй энэрхы зөөлэн эхэ Софья Цыбикжаповна зээ хүбүүндээ нагаса эжы гэжэ нэрлүүлжэ, хоёр зээнсэрээ хаража, зүрхэ сэдьхэл дүүрэн, жаргалтай ажаhууна. Хүнгэн хүлтэй, нютагайнгаа зондо туhалалсажа, Улаан-Үдэ хотодо hуудаг нютагаархидайнгаа эблэлдэ олон жэлдэ эдэбхитэйгээр, оролдосотойгоор хүдэлжэ, олониитын хэмжээ ябуулгануудта мүнөө хүрэтэрөө хамhалсажа ябадаг.
Софья Доржиевагай гэр бүлын жасаһаа гэрэл зураг абтаба
Цыпилма БУДАЕВА
