998
Мэнэ һая долоон хоногой урдахана Ононой урда бэедэ үй түмэн зээрэнүүдэй харгы зам бүһэлжэ ябахыень хараад, ямар нэгэ үзэсхэлэнтэ Африкын амитадай сафарида ябаһан мэтэ байгаа. Мэдээжэ найруулагша, гүн ухаатан Виктор Балдоржиевай һуурижаһан Ононой аймагай Новая Заря тосхон хүрэжэ, Ага, Буряад ба Усть-Ордаһаа амяаран нютагуудаар ажамидардаг буряадуудаа хаража, хүсэд түгэд буусануудыень, байра байдалыень ба абари зангыень өөгшөөжэ ерээбди.
“Забһарай буряадууд” гэжэ ара нэрэ өөртөө гаргаһан тэрээ руухи манай улад урдахи хубияа һэнгэргүй хаагаад, нютаг нугынгаа ажабайдалай эреэ- маряанда өөдэрхэнгүй, бэе бэеэ газаашалангүй, минии оюутан хаһаһаа хэлсэдэгээр: “чи би гэлсэнгүй, шэгшы хургаар заалсангүй” һууна. Теэд иимэ байдал гурбан можодо амидаржа байһан ямаршье хүдөө һуурин ошожо унхидабал дайралдахал даа. Харин Улаан-Үдымнай “томо толгойтойшуулай” олоороо обооролдоһон газарта юундэ байд гээд лэ, һэжэг түрэмэ хөөрэлдөөнүүд һүжэрхэеэ һананаб. Илангаяа хабар намарай хашанха сагуудые һунган?
Хори гаран жэлэй саана “Буряад үнэнэй” үүсхэһэн “Буряадай түрүү хүнүүд” урилдаан дүн хамта мянгаад улад зониие һагшан, алдар нэрэ, ажалайнь габьяа, уг унгиинь бусайдалгануудые сониной нюурнууд дээрээ мүнхэрүүлээ. Хаа-хаагуур олон айлай гунгарбаа ба гэр бүлын нарин дансын суглуулбаринууд, хубиин ажахын һаруул офисууд соо Ардан Ангархаевай гар бэшэгтэй үргэмжэлэлнүүдые харадагбди. Олониитэеэ суглуулха өөрын үүргэеэ энэ харалгамнай яһалахан дүүргээ.
Мүнөө жэлэйнгээ дүн согсолходоо, бидэ анхан захалһандаа бусажа, түрүүшүүлэй түрүүе шэлэхэ зорилготойгоор шүүгшэдые урижа, бэлэн бэшэ уялга даалгаабди. Энэ ябадалыемнай зүб тээшэнь шиидхэжэ, “үргэхэдэ - үндэр сагаагшан, дарахада - даахитай боро” гэжэ сэсэн үгүүлэл дууряан, манайнгаа ябадал тэсэмгэй даажа гарахат гэжэ найданамди. Элдэб эсээр хубилаа тус харалгамнай, харин ерэхэ жэл халта забһарлал абажа, тэрэнэй удаадахи жэл 100 наһанайнгаа ойн баяр угтуулан, энэ харалгын дүн өөрсэ оньһотойгоор шэнжэлхэбди гэжэ найдуулая.
Баир ШИРАПОВ, «Буряад үнэн» Хэблэлэй байшанай захирал-ахамад эрхилэгшэ
