825
Һаяхана Дулдаргын хизаар ороноо шэнжэлэлгын музей соо уран гартан Дулма Балдановагай хубиин үзэсхэлэн дэлгээгдээ.
Дулма Жамбаловна мүнөө дээрээ Ким Базарсадаевай нэрэмжэтэ Агын хүүгэдэй уран урлалай һургуулиин зурагай багшаар хүдэлнэ. Зурагай хэшээл ябуулхаһаа гадуур өөрын гараар элдэб бүтээлнүүдые яажа урлахаб гэжэ хүүгэдтэ заана. Өөрөө зохёохы талаан бэлигтэй, гарай элдэб бүтээл урладаг Дулма Балданова олон конкурснуудта хабаадаһан юм. Мүнөө хубиингаа үзэсхэлэндэ тэрэ буряад хүүхэлдэйнүүдые, амитадай дүрэнүүдые, хасуури болон бусад бүтээлнүүдые дурадхана. Энэ хэмжээ ябуулгада һургуулиин наһанай хүүгэд, багшанар, соёлой ажалшад оролсоһон байна. Тус үзэсхэлэн декабриин 30 болотор үргэлжэлхэ.
«Толон» сонинһоо
