Соёлой шэнэ байшан
Үнгэрһэн амаралтын үдэр Хори аймагаар албанай хэрэгээр ябаһан Буряад Уласай Толгойлогшо Алексей Цыденов Баян-Гол һуурин хүрэжэ, байра байдалтайнь танилсаа.
Ажабайдалынь һайжарна
Һүүлэй хэдэн жэлдэ Хориин Баян-Гол һууринда байдалынь һайн тээшэ тэхэрижэ эхилбэ. Нютагай дэргэдэхи Баян Хонгор уулада табигдаһан 33 метр үндэртэй Будда бурханай дүрэ нүлөөлнэ гэжэ ехэнхи зон хэлэнэ.
Будда бурханай дүрэ Энэдхэгтэ бүтээгдэжэ, Баян-Гол асарагдаа һэн. Хэдэн жэлэй саада тээ рамнайдань дүрбэн мянга гаран хүн суглараа бэлэй. Мүнөө дээрээ энэ дүрые харахаяа, мүргэхэеэ аяншалагшад, юрыншье зон олоор ябана. Тиигэжэ тэдэ Баян-Голой ажаһуугшадһаа һүнэй зүйлнүүдые болон бусад эдеэ хоол худалдажа абана.
Баян-Голой урдахана оршодог Могой нуурай хажууда найман субарга нютагаархид өөһэдын хүсөөр бодхоогоо. Хүн зоной мэдээсэһээр, субаргануудай зосоо дүрбэн мянга гаран бурхадай дүрэ хэгдэнхэй.
“Дорстройсервис” бүлгэмэй захирал Батор Бабасанович Цынгуевай тэмдэглэһээр, Баян-Голой ажабайдал дээрэ нэрлэгдэһэн хада бурхадһаа дулдыдана.
- Һүүлэй хэдэн жэлдэ манай һууринда ажабайдал һайжаржал байна. Нютагайнгаа зоной ашаар Эсэгэ ороноо хамгаалгын дайнда хабаадагшадта зорюулагдаһан хүшөөгөө һэльбэн шэнэлээбди. Һаяхана соёлой болон спортын шэнэ комплекс ашаглалда тушаагаабди. Шэнэ байшантай болоһон барилдааша хүбүүднай һайн дүнгүүдые харуулжа эхилбэ. Хэжэнгэдэ болоһон аймагууд хоорондын мүрысөөндэ нютагаймнай хүбүүн гурбадахи һуури эзэлээ, - гэжэ Батор Цынгуев хөөрэнэ.
Илалтын хүшөө
Соёлой болон спортын танхим
Соёлой болон спортын танхим баянголойхид өөһэдын хүсөөр бодхоожо эхилһэн юм. Хуушан байшаниинь хэдэн жэлэй урда тээ шаташоо бэлэй. Һууринай ТОС-уудые барилгада 100 мянга гаран түхэриг дамжуулаа. Баян-Голһоо уг гарбалтай Батор Цынгуев болон Баир Намдыкович Долгоров гэгшэд барилгада тон ехээр туһалаа. Тэдэнэй ударидадаг эмхинүүд 8 сая түхэриг дамжуулаа. Алексей Цыденовэй ашаар барилгын түгэсхэлдэ уласай бюджедһээ 2 сая 500 мянган түхэриг үгтөө гээд хэлэлтэй.
Соёлой болон спортын шэнэ байшан үүдэеэ октябриин 11-дэ сэлиһэн байна. Энэ үдэр бүгэдэ баянголойхид сугларжа найрлаа, мүрысөөнүүдые эмхидхээ. 79 үрхэтэй Баян-Голой ажаһуугшадта тон ехэ баяр болоо. Һууринһаа гаража ошоһон хүн зон бэлэг сэлэгүүдтэй нютагаа ерээ.
Мүнөө энэ байшанда нютагай номой сан, 120 һуудалтай заал тоологдоно. Мүн “Баян-Гол” гэһэн аман зохёолой ансамбль өөрын байратай болоо. Баир Долгоровой хэлэһээр, нүгөө жэл соёлой болон спортын байшанда залгалаа баригдаха юм.
Һургуулиин байшан һандарна
Баян-Гол һууринда һүүлэй жэлдэ хэдэн гэр бүлэнүүд хото городһоо гэдэргээ зөөжэ ерээ. Мүн үхибүүдэй тоо олошорно. Мүнөө Баян-Голой юһэн классай һургуулида 31 үхибүүн һурана. 9-дэхи классые ерэхэ жэлдэ хоёр үхибүүн дүүргэхэ. Сентябриин 1-дэ табан үхибүүн ерэхээр хараалагдана. Һүүлэй мэдээгээр, Баян-Голдо 6 наһа хүрөөдүй 31 үхибүүн тоологдоно. Харин тэдэниие һургаха гэхэдэ, һургуулиин байшан хуушаранхай. Орёо байдалтай байшаниие Буряадай Толгойлогшо орожо хараһан байна.
Һургуулиин захирал Жамсаран Дабаев
Баян-Голой һургуулиин байшан 1970-аад онуудай юм. 1994 ондо мүнөө байһан һуурида табигдаа. Тиихэдэ хуушан хушалтыень үлөөгөө һэн.
- Мүнөө һургуулимнай орёо байдалда оронхой. Бага багаар өөһэдөө заһабарилнабди. Теэд энэ тиимэ ехээр туһалнагүй. Багашье бороогой ороходо, дуһаалдаг болонхой. Мүн хаяа хана, үһээ, оёорнай үмхирэнхэй. Һургуулиин зосоо ябахадамнай, оёор хүдэлжэ байдаг. Һургуулияа мүнөөшье болотор түлеэгээр түлинэбди. Мүн үхибүүдэй хоол бариха газар дуталдана, - гэжэ Баян-Голой юһэн жэлэй һургуулиин захирал Жамсаран Ширапович Дабаев хөөрэнэ.
Нютагай түрүүшүүл
Капитальна заһабарилгада 8,5 сая түхэриг хэрэгтэй. Мэргэжэлтэ шүүбэри энэ мүнгэндэнь хэгдэнхэй.
- Буряадайнгаа ниислэл хүрөөд, танай асуудал бүхы талаһаань хаража үзэхэбди. Юуб гэхэдэ, иимэ бага һууринуудта һуралсалай гуламтануудые заһабарилха гэжэ оролдонобди. Һургуулигүйгөөр бага һууринууд орхигдохо. Тиимэһээ туһалхал байхабди, - гэжэ Алексей Цыденов найдуулаа.
“Буряад Уласай 100 онсо шухаг хүдөө һууринуудай” тоодо ородог Баян-Гол һуурин урма зоригтойгоор урагшаа дабшана.
Борис БАЛДАНОВАЙ гэрэл зурагууд